आजपासून कार्तिकी एकादशी सुरू झाल्याने देशभरातून हजारो भाविक पंढरपुरात दाखल झाले आहेत. पंढरपुरात भक्ती आणि शक्तीचा अभूतपूर्व संगम पाह्यला मिळत आहे. कार्तिकी निमित्ताने पंढरपूर मंदिरावर विद्यूत रोषणाई करण्यात आली आहे. त्यामुळे डोळ्याची पारणं फेडावीत असं दृश्य दिसत आहे. चला नजर टाकूया मंदिराच्या आकर्षक विद्यूत रोषणाईवर...
पुणे जिल्ह्यातील विठ्ठल भक्त विनोद जाधव यांनी विठ्ठल रुक्मिणी मंदिराला ही आकर्षक विद्युत रोषणाईची सेवा दिली आहे. नानाविविध रंगाच्या दिव्यांनी हे विठ्ठल मंदिर न्हाऊन निघाले आहे.
विठ्ठल मंदिराचे महाद्वार , रुक्मिणी द्वार, पश्चिम द्वार या प्रमुख प्रवेशाच्या ठिकाणी आकर्षक रोषणाई करण्यात आली आहे. तसेच संपूर्ण मंदिर परिसर , संत तुकाराम भवन , दर्शन मंडप देखील या रोषणाईने उजळून गेला आहे.
मंदिराच्या आतील बाजूस देखील आकर्षक रोषणाईस आता सुरुवात करण्यात आली असून सभामंडपही या आकर्षक रोषणाईने झगमगू लागला आहे.
संत नामदेव पायरीजवळ अतिशय आकर्षक पद्धतीने LED दिव्यांच्या माळा वापरून रोषणाई करण्यात आली आहे. मंदिराची शिखरे आणि मंदिरावर विविध रंगांच्या दिव्यांचे फोकस मारण्यात आल्याने विठ्ठल मंदिराचे रुपडेच पालटले आहे.