शिवसेना मंत्री आणि युवासेनाप्रमुख आदित्य ठाकरे आज सकाळी ११ वाजता अयोध्येत दाखल झाले आहेत. अयोध्येत ते श्रीरामांचं दर्शन घेतील. आदित्य ठाकरे यांच्या अयोध्या दौऱ्यासाठी मुंबई, नाशिक आणि पुण्यातून मोठ्या संख्येने शिवसैनिकही इथे दाखल झाले आहेत.
आदित्य ठाकरे लखनऊ विमानतळावर दाखल झाल्यानंतर त्यांचं ढोल-ताशांच्या गजरात मोठं स्वागत करण्यात आलं. विमानतळावर त्यांच्यावर पुष्पवृष्टीही करण्यात आली.
आपल्या अयोध्या दौऱ्यादरम्यान आदित्य ठाकरेंनी हा कोणताही राजकीय दौरा नसल्याचं स्पष्ट केलं. केवळ श्रीरामांचं दर्शन घेण्यासाठी इथे आलो असून हा आमच्या श्रद्धेचा भाग असल्याचंही ते म्हणाले.
अयोध्येत श्रीरामांचं दर्शन घेण्याआधी आदित्य ठाकरे यांनी इस्कॉन मंदिरात श्रीकृष्णाचं दर्शन घेतलं. यानंतर ते साडेपाचच्या सुमारास श्रीराम जन्मभूमी येथे श्रीरामांच्या दर्शनासाठी रवाना होतील.
त्याआधी अयोध्येतील पंचशील हॉटेलमध्ये ते थांबणार असून दुपारी साडेतीनच्या सुमारास पत्रकार परिषद घेणार असल्याची माहिती आहे.
त्यानंतर बुधवारी रात्री शरयू नदीच्या काठी ते महाआरतीसाठीही सहभागी होतील. तसंच यावेळी युवा सेनेकडून शरयू नदीच्या काठी शक्तीप्रदर्शनही केलं जाणार आहे.