महाराष्ट्र राज्याचे अन्न, नागरी पुरवठा व ग्राहक संरक्षण मंत्री आणि नाशिक जिल्ह्याचे पालकमंत्री छगन भुजबळ सिन्नर तालुक्यातील डुबेरे येथे एका कार्यक्रमाला गेले होते.
तिथून परतत असताना नाशिक- पुणे महामार्गावर चारचाकी आणि दुचाकीमध्ये अपघात झाला. यावेळी मंत्री छगन भुजबळ यांनी आपला वाहनाचा ताफा थांबवत पुढाकार घेऊन अपघातग्रस्तांची भेट घेतली.
भुजबळांनी यावेळी अपघात झालेल्या जोडप्याची चौकशी करत त्यांना धीर दिला. एका व्यक्तीच्या डोक्यातून बराच रक्तप्रवाह होत होता. त्या व्यक्तीने आपल्या डोक्याला रुमाल लावून धरला होता. एवढा मोठा मंत्री आपल्या चौकशीला आल्यामुळे त्या व्यक्तीलादेखील अवघडल्यासारखे झाले.
पुढे भुजबळांनी कर्मचारी आणि पोलिसांच्या मदतीने आपल्या ताफ्यातील गाडी अपघातग्रस्तांना उपलब्ध करून देत तातडीने सिन्नर येथील रुग्णालयात पाठविले. त्यानंतर भुजबळांनी सिन्नर येथील डॉक्टरांना माहिती देऊन योग्य ते उपचार करण्याच्या सूचना दिल्या.
तसेच, अपघातग्रस्त कुटुंबाला आवश्यक ती मदत उपलब्ध करून देण्याच्या सूचना त्यांनी केल्या.