स्वादूपिंडाच्या कर्करोगानं त्रस्त असलेले गोव्याचे मुख्यमंत्री मनोहर पर्रिकर यांनी पुन्हा एकदा कामकाजाला सुरुवात केली आहे. त्यांच्या नाकाला नळ्या लावण्यात असून दुसऱ्याची मदत घेऊन त्यांना चालावं लागतं. अशा स्थितीतही त्यांचा आत्मविश्वास कायम आहे.
मनोहर पर्रिकर यांनी बुधवारी गोव्याच्या विधानसभेत अर्थसंकल्प सादर केला. अर्थसंकल्पीय भाषण त्यांनी हळू आवाजात व सावकाश केलं. मात्र, त्यातही त्यांचा ठामपणा दिसून येत होता.
पर्रिकरांच्या अर्थसंकल्पीय भाषणाबद्दल साऱ्यांनाच उत्सुकता होती. आपल्याकडं अनेकांचं लक्ष लागल्याची जाणीव असल्यानं त्यांनी भाषणाची सुरुवात वेगळ्या अंदाजात केली. ते म्हणाले, 'परिस्थिती अशी आहे की मी विस्तृत बजेट सादर करू शकत नाही. मात्र, माझा जोश कायम असून मी पूर्णपणे भानावर आहे.
एका कार्यक्रमादरम्यान उपस्थितांना संबोधित करताना त्यांनी 'हाउज द जोश' अशी विचारणा केली होती. काँग्रेसनं त्यावर टीका करताना 'जोश'च्या गप्पा करणारे पर्रिकर 'होश'मध्ये (भानावर) आहेत का, असा टोला हाणला होता. त्याला पर्रिकर यांनी अर्थसंकल्पीय भाषणातून उत्तर दिले.
पर्रिकर यांच्यावर गेल्या अनेक दिवसांपासून देश व विदेशात उपचार सुरू होते. आजारातून सावरल्यानंतर त्यांनी पुन्हा कामाला सुरुवात केली आहे. लोकांच्या गाठीभेटीही सुरू केल्या आहेत. फायली हातावेगळ्या करण्याचं कामही त्यांनी सुरू केलं आहे.
पुन्हा कामकाज हाती घेतल्यानंतर पर्रिकर सार्वजनिक कार्यक्रमांमध्येही हजेरी लावू लागले आहेत. अलीकडंच त्यांनी नागरी सेवासुविधांचं लोकार्पणही केलं.