भारतीय क्रिकेट संघातील युवा फलंदाज पृथ्वी शॉचा आज वाढदिवस! पृथ्वी आज त्याचा १९वा वाढदिवस साजरा करतोय. गेल्या महिन्यात त्यानं आंतराष्ट्रीय क्रिकेट खेळायला सुरूवात केली. मिळालेल्या प्रत्येक संधीचं पृथ्वीनं सोनं केलं आहे. एक नजर टाकूयात त्याच्या क्रिकेट करिअरवर...
पृथ्वी शॉच्या नेतृत्वात भारतानं अंडर-१९ विश्वचषक जिंकला. अंतिम सामन्यात टीम इंडियानं ऑस्ट्रेलियावर ८ गडी राखून दणदणीत विजय मिळवला होता.
आयपीएल २०१८ साठी तब्बल ५७८ खेळाडू रिंगणात होते. यात पृथ्वीनं चांगलीच बाजी मारली. दिल्ली डेअरडेव्हिल्सनं त्याला १ कोटी २० लाख रूपयांना विकत घेतले होते. तसंच आयपीएल इतिहासात सर्वात कमी वयात अर्धशतक ठोकण्याचा विक्रमही पृथ्वीच्या नावावर जमा झालाय.
वयाच्या १८ व्या वर्षी कसोटी क्रिकेटमध्ये पदार्पण करणाऱ्या पृथ्वीनं आपल्या आक्रमक शैलीनं पहिल्याच सामन्यात ९९ चेंडूंमध्ये शतक झळकावण्याची किमया केली. आणि सामनावीर किताबही पटकावला. पदार्पणात सामनावीर ठरणारा पृथ्वी हा सहावा भारतीय खेळाडू आहे.
प्रथम श्रेणी आणि आंतरराष्ट्रीय कसोटी क्रिकेटमध्ये पदार्पणाच्या सामन्यांत शतक ठोकणारा पृथ्वी हा जगातील तिसरा खेळाडू ठरला आहे. क्रिकेटच्या इतिहासात यापूर्वी हा मान फक्त भारताच्या गुंडप्पा विश्वनाथ आणि ऑस्ट्रेलियाच्या डर्क वेलहॅम यांनाच मिळाला आहे.
सचिन तेंडुलकर नंतर सगळ्यात कमी वयात कसोटी सामन्यामध्ये शतक ठोकणारा पृथ्वी दुसरा भारतीय ठरला आहे. सचिननं १७ वर्ष ११२ दिवसांचा असताना पहिलं शतक केलं होतं तर पृथ्वीनं १८ वर्ष ३२९ दिवसांचा असताना पहिलं शतकं झळकावलं.