काही दिवसांपूरवी भारताचे पंतप्रधान नरेंद्र मोदी यांनी देशाला संबोधन केले होते. या भाषणामध्ये त्यांनी आत्मनिर्भर भारत ही संकल्पना मांडली होती.
या भाषणानंतर मोदी यांची काही जणांनी खिल्लीही उडवली होती. कारण आत्मनिर्भर म्हणजे काय, याचा खुलासा मोदी यांनी केला नसल्याचे टीकाकारांचे म्हणणे होते.
आत्मनिर्भर भारत म्हणजे काय, हे उलगडून दाखवण्याचा प्रयत्न भारताची महिला कुस्तीपटू आणि भाजपाची नेता बबिता फोगटने केला आहे. बबिताने फक्त एका चित्राच्या माध्यमातून आत्मनिर्भर भारत म्हणजे काय, हे समजावून सांगितले आहे. बबिताचे ट्विट सध्या चर्चेचे विषय ठरत आहेत.
महाराष्ट्रामध्ये जेव्हा दोन सांधूंची हत्या झाली होती, तेव्हा बबिताने थेट मुख्यमंत्री उद्धव ठाकरे यांनाच लक्ष्य केले होते. ठाकरे सरकारच्या राज्यात काय चाललंय, असा प्रश्नही तिने उपस्थित केला होता. बबितावर महाराष्ट्रात गुन्हाही दाखल करण्यात आला होता.
आत्मनिर्भर भारत ही संकल्पना मांडताना बबिताने एका व्यंगचित्राच्या माध्यमातून ही गोष्ट सांगितली आहे. त्याचबरोबर आपल्याला आता आत्मनिर्भर भारत बनवायचा आहे, असे बबिताने आपल्या पोस्टमध्ये सांगितले आहे.
बबिताने आपल्या पोस्टमध्ये लिहिले आहे की, आता आपल्याला थांबून चालणार नाही. कारण सर्वांना आता पुढे चालत राहायचे आहे. आपल्या सर्वांना आता आत्मनिर्भर भारत बनवायचा आहे.
हा फोटो बबिताने पोस्ट केला आहे. या फोटोमध्ये आपण स्वदेशी गोष्टी विकत घ्यायला हव्यात. करोनाशी लढाई आपली सुरुच राहणार आहे, पण दुसरीकडे स्वदेशी गोष्टी वापरून आपण आत्मनिर्भर होऊया, असा संदेश देण्यात आला आहे.