दररोज आपल्याला बरेच ई-मेल्स येतात. त्यापैकी काही ई-मेल्स ही महत्त्वाचे आणि आपल्यासाठी पाठवलेले असतात. मात्र, येणाऱ्या ई-मेल्समध्ये अनावश्यक मेल्सची संख्या अधिक असल्याने उपयुक्त मेल शोधण्यामध्ये व इतर मेल्स डिलिट करण्यामध्ये बराच वेळ खर्ची पडतो. अशाप्रकारचे ई-मेल बंद करण्यासाठी काही विशिष्ट सेवाही उपलब्ध आहेत. त्यांची ही ओळख...
कोणताही ई-मेल सेवांच्या सोबत येणारा अनसबस्क्राइबचा पर्याय अनावश्यक ई-मेल बंद करण्याचा सर्वांत सोपा मार्ग आहे. साधारणत: प्रत्येक अनावश्यक ई-मेलसोबत खालच्या बाजूस अनसबस्क्राइबची लिंक उपलब्ध असते. तथापि, या लिंकवर क्लिक करणे हा एकप्रकारचा सापळाही असू शकतो. कारण, त्यामुळे तुम्ही खरोखरची व्यक्ती आहात आणि तुमचा ई-मेल आयडी वापरातला आहे, या गोष्टी सिद्ध होतात. त्यामुळे ई-मेल सेवांकडून देण्यात येणारा अनसबस्क्राइबचा पर्याय निवडणे अधिक सुरक्षित आहे.
डेस्कटॉपवरून जी-मेल वापरणाऱ्यांना अतिशय सहजपणे कोणताही ई-मेल आयडी अनसबस्क्राइब करण्याची सुविधा गुगलने उपलब्ध करून दिली आहे. एखाद्या ई-मेलमध्ये अनसबस्क्राइबची लिंक असल्याचे जी-मेलला आढळल्यानंतर गुगलकडून आपणहून त्या ई-मेलच्या वरच्या बाजूस पाठवणाऱ्याच्या नावाच्या बाजूलाच अनसबस्क्रायबचा पर्याय देण्यात येतो. काहीवेळा टूलबारमध्ये ‘स्पॅम’ चिन्हाच्या शेजारीही हा पर्याय दिसतो. हा पर्याय निवडल्यानंतर तुम्ही संबंधित ई-मेलपासून स्वत:ची सुटका करून घेऊ शकता
आउटलूक डॉट कॉम आणि आउटलूक अॅप या दोन्ही ठिकाणी अनसबस्क्राइबची लिंक ठळकमध्ये देण्यात आले आहे. टूलबारमध्ये स्पॅमच्या चिन्हाजवळच ही लिंक असून ई-मेल उघडल्यानंतर या लिंकवर क्लिक केल्यास संबंधित मेल अनसबस्क्राइब होतो.
ही वापरण्यास अतिशय सोपी सेवा आहे. GetUnsubscriber.com या वेबसाइटवर तुमचा ई-मेल टाकल्यानंतर तुमच्या ई-मेल इनबॉक्समध्ये अनसबस्क्रायबर हा फोल्डर नव्याने दिसू लागतो. त्यानंतर, तुम्हाला नको असलेले ई-मेल्स तुम्हाला एकदा या फोल्डरमध्ये आणून टाकावे लागतात. पुढच्या वेळेपासून ते ई-मेल्स गाळून अनसबस्क्रायबर अन्य ई-मेल्स तुमच्यापुढे सादर करतो. कोणत्याही ई-मेल सेवेसोबत अनसबस्क्रायबर वापरता येऊ शकते. ही सेवा मोफत आहे. तथापि खासगी व वैयक्तिक माहिती वगळता अन्य माहिती या सेवेकडून साठवण्यात येत असल्याचे (उदा. व्यावसायिक ई-मेल्स) त्यांनी स्पष्ट केले आहे.
वेब आणि अॅप अशा दोन्ही प्रकारांमध्ये उपलब्ध असलेले अनरोल डॉट मी ही सेवा तुमच्या आउटलूक, जीमेल/जीसूट, याहू मेल, आणि एओएल इत्यादी ई-मेल अकाउंटमधून तुम्हाला निरुपयोगी असलेले ई-मेल शोधून काढू शकते. त्यासाठी तुम्ही तुमचा ई-मेल आयडी या वेब किंवा अॅपवर टाकावा लागतो. त्यानंतर, ही सेवा हे अनावश्यक मेल पाठवणाऱ्यांची यादी तुमच्यासमोर सादर करते. त्या यादीतील नावे निवडून त्यांना ‘अनरोल’ हा पर्याय निवडल्यास त्यांच्याकडून तुम्हाला पाठवण्यात येणारे ई-मेल बंद होतात.