उज्ज्वल निकम यांनी संजय दत्तला फटकारले!

पंढरपूर । सुनील दिवाण

'संजय दत्त कोणत्याही स्वातंत्र्यलढ्याची शिक्षा भोगून तुरुंगाबाहेर आलेला नाही. त्यामुळं स्वत:चं उदात्तीकरण करून तो स्वातंत्र्यसैनिक होऊ शकत नाही,' असा सणसणीत टोला विशेष सरकारी वकील उज्ज्वल निकम यांनी संजय दत्तला हाणला आहे.

बेकायद शस्त्रास्त्र बाळगल्याच्या प्रकरणी शिक्षा झालेला संजय दत्त काल अखेर शिक्षा संपवून तुरुंगातून बाहेर आला. 'स्वातंत्र्याचा मार्ग सोपा नव्हता, अशी प्रतिक्रिया त्यानं तुरुंगातून बाहेर आल्यावर दिली होती. तसंच, मीडियानं आपल्याला दहशतवादी ठरवू नये, अशी विनंती केली होती. संजूबाबाच्या या प्रतिक्रियेवर बोलताना उज्ज्वल निकम यांनी त्याला फटकारले. 'संजय दत्त कोणत्याही स्वातंत्र्यलढ्याची शिक्षा भोगून बाहेर आलेला नाही, असं ते म्हणाले. 'आपल्या घरी शस्त्रास्त्रं असल्याची माहिती त्यानं वेळीच दिली असती तर मुंबईत बॉम्बस्फोटच झाले नसते. या प्रकरणी त्याच्यावर टाडाखाली खटला चालला नाही याविषयी मला काहीही म्हणायचे नाही. पण, असं वक्तव्य करण्यापूर्वी आपण खरंच निष्पाप होतो का, याचा विचार त्यानं करायला हवा, असं ते म्हणाले. शिवाय, पुन्हा त्यानं अशी चूक करता कामा नये, असा सल्लाही दिला. ते पंढरपूर येथे बोलत होते.