वृत्तसंस्था, रिओ दी जानेरो
डोपिंग प्रकरण मागे टाकून भारतीय पथक रिओ ऑलिम्पिकसाठी सज्ज झाले आहे. ३१व्या ऑलिम्पिक स्पर्धेत भारताचे ११८ खेळाडू सहभागी होत आहेत. आतापर्यंतचे हे भारताचे सर्वांत मोठे पथक असले, तरी या पथकातील किती जण भारताच्या खात्यात पदक जमा करतील, याबाबत उत्सुकता आहे.
लंडन ऑलिम्पिक स्पर्धेत भारताने सहा पदकांची कमाई केली होती. त्यामुळे या वेळी भारतीय खेळाडू पदकांचा दुहेरी आकडा गाठतील, असा अंदाज व्यक्त केला जात आहे. इंद्रजितसिंग आणि धरमवीर यांची नावे डोपिंगमध्ये आल्याने ते सध्या रिओमध्ये दाखल झालेले नाहीत, तर कुस्तीगीर नरसिंग यादवला नाडाने (राष्ट्रीय उत्तेजकविरोधी पथक) क्लीन चिट दिली आहे. हे सर्व वादग्रस्त मुद्दे मागे टाकून भारतीय खेळाडू नव्या आव्हानासाठी सज्ज झाले आहेत.
पहिला दिवस जितू रायचा
स्पर्धेच्या पहिल्या दिवशी म्हणजे शनिवारी भारताला नेमबाज जितू रायकडून पदकाच्या अपेक्षा असतील. रिओत तो दोन प्रकारात सहभागी होत असला, तरी ६ ऑगस्टला तो १० मीटर एअर पिस्तूलमध्ये आपले कौशल्य दाखविणार आहे. वर्ल्ड कप, आशियाई आणि राष्ट्रकुल स्पर्धांमध्ये जितूने आतापर्यंत दोन सुवर्ण, तीन रौप्य आणि एक ब्राँझपदक मिळवले आहेत. रिओमध्ये भारताचे १२ नेमबाज सहभागी झाले आहेत. त्यामुळे यातच भारताला अधिक पदकांची अपेक्षा आहे. उद्घाटन सोहळ्यातील भारतीय पथकाचा ध्वजधारक अभिनव बिंद्राची ही शेवटची ऑलिम्पिक आहे. ही स्पर्धा संस्मरणीय करण्याचा त्याचा प्रयत्न असेल.
कुस्तीत अपेक्षा
नेमबाजांपाठोपाठ भारताला पदकाची अपेक्षा आहे ती कुस्तीमध्ये. लंडन ऑलिम्पिक स्पर्धेत ब्राँझपदक मिळवणाऱ्या योगेश्वर दत्त ६५ किलो फ्रीस्टाइलमध्ये सहभागी होत आहे. या वेळी भारताचे ८ मल्ल आपले कसब दाखविणार आहेत. नरसिंग यादवचा रिओमध्ये समावेश करण्यात आला असला, तरी त्याला वाडाच्या निर्णयाची वाट बघावी लागणार आहे. महिलांमध्ये विनेश फोगट, बबिताकुमारी, साक्षी मलिक यांच्याकडूनही सनसनाटी निकालाची अपेक्षा केली जात आहे.
बॉक्सिंग, तिरंदाजांवर लक्ष
लंडन ऑलिम्पिकमध्ये भारताचे ८ बॉक्सर सहभागी झाले होते. यावेळी मात्र शिवा थापा (५६ किलो), विकास कृष्णन (७५ किलो) आणि मनोजकुमार (६४ किलो) या तिघांकडूनच अपेक्षा आहे. तिरंदाजीत लंडन ऑलिम्पिकमध्ये दीपिकाकुमारीने निराशा केली होती. या वेळी तरी तिला पदकाचा वेध घेता येतो का, हे पाहणे रंजक ठरणार आहे. कोरिया, मेक्सिको, इटलीच्या तिरंदाजांचे आव्हान भारतीय तिरंदाजांसमोर असणार आहे.
पेस, सानियाला बोपण्णाची साथ
सातवे ऑलिम्पिक खेळत असलेल्या अनुभवी टेनिसपटू लिअँडर पेसकडून या वेळी चाहत्यांना अधिक अपेक्षा आहेत. तो दुहेरीत रोहन बोपण्णासह सहभागी होत आहे. मिश्र दुहेरीत बोपण्णा सानिया मिर्झासह खेळणार आहे आणि महिला दुहेरीत सानिया महाराष्ट्राच्या प्रार्थना ठोंबरसह प्रतिस्पर्ध्याविरुद्ध दोन हात करणार आहे.
सायना की सिंधू
लंडन ऑलिम्पिकमध्ये बॅडमिंटनमध्ये सायना नेहवालने भारताच्या खात्यात ब्राँझपदक जमा केले होते. या वेळी तिच्याकडून पदकाचा वेगळा रंग अपेक्षित आहे. महिला एकेरीत तिच्यासोबत पी. व्ही. सिंधूही आहे. भारतीय खेळाडूंसमोर स्पेन, कोरिया, चायनीज तैपेई, चीनच्या खेळाडूंचे आव्हान असेल. ज्वाला गुट्टा-अश्विनी पोनप्पा आणि के. श्रीकांत यांच्या कामगिरीवरही लक्ष असेल.
अॅथलेटिक्समध्ये पदक मिळाल्यास हा भारतासाठी चमत्कारच म्हणावा लागेल. खेळाडूंची तयारी चांगली झाली असली, तरी भारतीय खेळाडूंना पदकापर्यंत ‘धाव’ घेण्यासाठी चमत्कारच करून दाखवावा लागेल. २२ वर्षीय जिम्नॅस्ट दीपा कर्माकरकडूनही अपेक्षा बाळगल्या जात आहेत. हॉकीत पी. आर. श्रीजेशच्या संघाने सनसनाटी निकाल नोंदविला, तरी आश्चर्य वाटणार नाही. भारताने नियोजनबद्ध खेळ केला, तर पदकाची अपेक्षा आहे. ऑलिम्पिकमध्ये ११२ वर्षांनंतर गोल्फचा समावेश करण्यात आला आहे. रिओत अनिर्बन लाहिरी, चौरासिया आणि १८ वर्षीय आदिती अशोक काय कमाल दाखवितात, याकडे साऱ्यांच्या नजरा असतील. ज्युदो, रोईंग, स्विमिंग, टेबल टेनिस, वेटलिफ्टिंगमध्येही भारतीय खेळाडू आहेत. पण यांच्यासमोर मोठे आव्हान असेल. भारतीय पथकातील संख्या अधिक असली, तरी प्रत्यक्षात पदके किती मिळतात, या प्रश्नाचे उत्तर अवघ्या काही दिवसांत मिळणार आहे.
डोपिंग प्रकरण मागे टाकून भारतीय पथक रिओ ऑलिम्पिकसाठी सज्ज झाले आहे. ३१व्या ऑलिम्पिक स्पर्धेत भारताचे ११८ खेळाडू सहभागी होत आहेत. आतापर्यंतचे हे भारताचे सर्वांत मोठे पथक असले, तरी या पथकातील किती जण भारताच्या खात्यात पदक जमा करतील, याबाबत उत्सुकता आहे.
लंडन ऑलिम्पिक स्पर्धेत भारताने सहा पदकांची कमाई केली होती. त्यामुळे या वेळी भारतीय खेळाडू पदकांचा दुहेरी आकडा गाठतील, असा अंदाज व्यक्त केला जात आहे. इंद्रजितसिंग आणि धरमवीर यांची नावे डोपिंगमध्ये आल्याने ते सध्या रिओमध्ये दाखल झालेले नाहीत, तर कुस्तीगीर नरसिंग यादवला नाडाने (राष्ट्रीय उत्तेजकविरोधी पथक) क्लीन चिट दिली आहे. हे सर्व वादग्रस्त मुद्दे मागे टाकून भारतीय खेळाडू नव्या आव्हानासाठी सज्ज झाले आहेत.
पहिला दिवस जितू रायचा
स्पर्धेच्या पहिल्या दिवशी म्हणजे शनिवारी भारताला नेमबाज जितू रायकडून पदकाच्या अपेक्षा असतील. रिओत तो दोन प्रकारात सहभागी होत असला, तरी ६ ऑगस्टला तो १० मीटर एअर पिस्तूलमध्ये आपले कौशल्य दाखविणार आहे. वर्ल्ड कप, आशियाई आणि राष्ट्रकुल स्पर्धांमध्ये जितूने आतापर्यंत दोन सुवर्ण, तीन रौप्य आणि एक ब्राँझपदक मिळवले आहेत. रिओमध्ये भारताचे १२ नेमबाज सहभागी झाले आहेत. त्यामुळे यातच भारताला अधिक पदकांची अपेक्षा आहे. उद्घाटन सोहळ्यातील भारतीय पथकाचा ध्वजधारक अभिनव बिंद्राची ही शेवटची ऑलिम्पिक आहे. ही स्पर्धा संस्मरणीय करण्याचा त्याचा प्रयत्न असेल.
कुस्तीत अपेक्षा
नेमबाजांपाठोपाठ भारताला पदकाची अपेक्षा आहे ती कुस्तीमध्ये. लंडन ऑलिम्पिक स्पर्धेत ब्राँझपदक मिळवणाऱ्या योगेश्वर दत्त ६५ किलो फ्रीस्टाइलमध्ये सहभागी होत आहे. या वेळी भारताचे ८ मल्ल आपले कसब दाखविणार आहेत. नरसिंग यादवचा रिओमध्ये समावेश करण्यात आला असला, तरी त्याला वाडाच्या निर्णयाची वाट बघावी लागणार आहे. महिलांमध्ये विनेश फोगट, बबिताकुमारी, साक्षी मलिक यांच्याकडूनही सनसनाटी निकालाची अपेक्षा केली जात आहे.
बॉक्सिंग, तिरंदाजांवर लक्ष
लंडन ऑलिम्पिकमध्ये भारताचे ८ बॉक्सर सहभागी झाले होते. यावेळी मात्र शिवा थापा (५६ किलो), विकास कृष्णन (७५ किलो) आणि मनोजकुमार (६४ किलो) या तिघांकडूनच अपेक्षा आहे. तिरंदाजीत लंडन ऑलिम्पिकमध्ये दीपिकाकुमारीने निराशा केली होती. या वेळी तरी तिला पदकाचा वेध घेता येतो का, हे पाहणे रंजक ठरणार आहे. कोरिया, मेक्सिको, इटलीच्या तिरंदाजांचे आव्हान भारतीय तिरंदाजांसमोर असणार आहे.
पेस, सानियाला बोपण्णाची साथ
सातवे ऑलिम्पिक खेळत असलेल्या अनुभवी टेनिसपटू लिअँडर पेसकडून या वेळी चाहत्यांना अधिक अपेक्षा आहेत. तो दुहेरीत रोहन बोपण्णासह सहभागी होत आहे. मिश्र दुहेरीत बोपण्णा सानिया मिर्झासह खेळणार आहे आणि महिला दुहेरीत सानिया महाराष्ट्राच्या प्रार्थना ठोंबरसह प्रतिस्पर्ध्याविरुद्ध दोन हात करणार आहे.
सायना की सिंधू
लंडन ऑलिम्पिकमध्ये बॅडमिंटनमध्ये सायना नेहवालने भारताच्या खात्यात ब्राँझपदक जमा केले होते. या वेळी तिच्याकडून पदकाचा वेगळा रंग अपेक्षित आहे. महिला एकेरीत तिच्यासोबत पी. व्ही. सिंधूही आहे. भारतीय खेळाडूंसमोर स्पेन, कोरिया, चायनीज तैपेई, चीनच्या खेळाडूंचे आव्हान असेल. ज्वाला गुट्टा-अश्विनी पोनप्पा आणि के. श्रीकांत यांच्या कामगिरीवरही लक्ष असेल.
अॅथलेटिक्समध्ये पदक मिळाल्यास हा भारतासाठी चमत्कारच म्हणावा लागेल. खेळाडूंची तयारी चांगली झाली असली, तरी भारतीय खेळाडूंना पदकापर्यंत ‘धाव’ घेण्यासाठी चमत्कारच करून दाखवावा लागेल. २२ वर्षीय जिम्नॅस्ट दीपा कर्माकरकडूनही अपेक्षा बाळगल्या जात आहेत. हॉकीत पी. आर. श्रीजेशच्या संघाने सनसनाटी निकाल नोंदविला, तरी आश्चर्य वाटणार नाही. भारताने नियोजनबद्ध खेळ केला, तर पदकाची अपेक्षा आहे. ऑलिम्पिकमध्ये ११२ वर्षांनंतर गोल्फचा समावेश करण्यात आला आहे. रिओत अनिर्बन लाहिरी, चौरासिया आणि १८ वर्षीय आदिती अशोक काय कमाल दाखवितात, याकडे साऱ्यांच्या नजरा असतील. ज्युदो, रोईंग, स्विमिंग, टेबल टेनिस, वेटलिफ्टिंगमध्येही भारतीय खेळाडू आहेत. पण यांच्यासमोर मोठे आव्हान असेल. भारतीय पथकातील संख्या अधिक असली, तरी प्रत्यक्षात पदके किती मिळतात, या प्रश्नाचे उत्तर अवघ्या काही दिवसांत मिळणार आहे.