म. टा. वृत्तसेवा, पंचवटी
इंडियन नॅशनल ट्रस्ट फाँर आर्ट अण्ड कल्चरल हेरिटेज, पुरातत्त्व आणि वस्तुसंग्रहालय विभाग संचालनालय यांच्यातर्फे सरकारवाडा येथे ‘वारसा आणि आपण’ या प्रदर्शनाचा रविवारी (दि.१२) रोजी शुभारंभ झाला. नागरिकांना आपल्याच भोवतालच्या परिसरात असलेल्या वारशाची माहिती व्हावी, दुर्लक्षित असलेल्या या वारशाचे जतन करण्यासाठी प्रेरणा मिळावी, या हेतूने हे प्रदर्शन भरविण्यात आले आहे. २५ नोव्हेंबरपर्यंत सकाळी १० ते सायंकाळी ६ या वेळेत हे प्रदर्शन सर्वांसाठी खुले राहणार आहे.
पुरातत्त्व आणि वस्तुसंग्रहालय विभाग संचालनालयाचे संचालक तेजस गर्गे यांच्या हस्ते या प्रदर्शनाचे उद्घाटन झाले. तर इन्टॅकचे संयोजक मुकुंद भोगले कार्यक्रमाच्या अध्यक्षस्थानी होते. नाशिक पुरातत्त्व विभागाचे सहाय्यक संचालक डॉ. श्रीकांत घारपुरे, योगेश कासारपाटील, जया घोलप, कृष्णा बालपांडे, कृष्णा राठी, समृध्द मोगल, सचिन पगारे आदी उपस्थित होते. इन्टॅकचे संयोजक शैलेश देवी यांनी स्वागत केले. रितू शर्मा यांनी आभार मानले.
या प्रदर्शनात १९ ते २५ या कालवधीत सरकारवाडा येथे जागतिक वारसा सप्ताहानिमित्ताने बोहडा मुखवटा कार्यशाळा घेण्यात येणार आहे. तसेच पेंटिंग तंत्राविषयी डॉ. श्रीकांत घारपुरे व गिरीश टकले संवाद साधणार आहेत. या प्रदर्शनात काळानुरुप संक्रमित होणारी आणि विविध शैलींचा मिलाफ असलेली प्राचीन ते आधुनिक काळापर्यंत विकसित होत असलेली स्थापत्य शैली, मध्ययुगातील वाडा संस्कृती, वास्तुकला, कलाकुसर, पुराश्मयुगापासून मानवी वस्तीचे पुरावे उदरात जपणारी भूमी, गोदावरीच्या काठानं आणि तिच्या साक्षीनं विकसित झालेली संस्कृती आदी मांडण्यात आली आहे. तसेच परंपरा बदलत असताना बांधकामात बदल होणेही गरजेचे आहे. मात्र, ते करीत असताना वारसा गोठावून टाकण्याची गरज नाही. लोकांना वारसा जागृत करण्यासाठी हा पहिलाच उपक्रम आहे. त्यांना वारसा दाखवून, त्यांना त्याचे महत्त्व सांगून त्याच्या मूल्याची जाणीव या प्रदर्शनातून करून देण्यात येत आहे.
प्रदर्शनात नाणे संग्राहक चेतन राजापुरकर, निलेश गावडे, बिना अंधारे, अनिता जोशी यांनी वारसा या विषयावर स्टॉल लावण्यात आले आहेत. गायिका अमृता मोगल यांच्या गायनाने कार्यक्रमाची सांगता झाली. तर नव्या रूपात सरकारवाडा पाहताना नाशिककर हरखून गेले होते.