शहनाज गिलच्या वडिलांनी केला भाजपामध्ये प्रवेश, वर्षभरापूर्वी होता बलात्काराचा आरोप

अमृतसर- 'बिग बॉस १३' मधून प्रसिद्धी मिळालेल्या शहनाज गिल चे वडील संतोख सिंग यांनी भाजपमध्ये प्रवेश केला आहे. 'बिग बॉस १३' दरम्यान शहनाजसोबत तिचे वडील संतोख देखील लोकप्रिय झाले होते. त्या सीझनमध्ये ते बिग बॉसच्या घरातही दिसले होते. मात्र गेल्या वर्षी एका महिलेने त्यांच्यावर बलात्काराचा आरोप केल्याने संतोख सिंग अडचणीत आले होते. पोलिसांनी त्याच्यावर गुन्हा दाखल करून तपास सुरू केला. मात्र, शहनाजच्या भावाने हे आरोप खोटे आणि बिनबुडाचे असल्याचं म्हटलं होतं.

मुलीशी भांडण झाल्याची आली होती बातमी, शपथ घेतो की तिच्याशी कधी बोलणार नाही

केवळ बलात्काराच्या आरोपांमुळेच नाही तर मुलगी शहनाजसोबतच्या नात्यातील कटुतेमुळेही संतोख सिंग चर्चेत राहिले होते. 'बिग बॉस 13' दरम्यान, शहनाज आणि तिचे वडील संतोख यांच्यात मतभेद झाल्याच्या अनेक बातम्या आल्या होत्या. गेल्या वर्षी संतोख शहनाजवर इतके चिडले होते की त्यांनी आपल्या मुलीशी कधीही न बोलण्याची शपथ घेतली होती.


एका मुलाखतीत संतोख म्हणाले होते की, 'शहनाजने चंदीगडमध्ये शूटिंग केले आणि तिचं घर चंदीगडपासून फक्त २ किलोमीटर अंतरावर असूनही ती तिच्या कुटुंबाला भेटायला येऊ शकली नाही. शहनाज चंदिगडमध्ये शूटिंग करत असल्याचं मला मीडियातून समजलं. तिने सांगितलंही नाही. आजोबांचे नुकतेच गुडघ्याचे ऑपरेशन झाले. निदान एकदा तरी ती त्यांना भेटायला यायला हवी होती. माझ्याकडे तिच्या मॅनेजरचा नंबरही नाही. मी आता शपथ घेतली आहे की मी आयुष्यभर तिच्याशी बोलणार नाही.

नंतर झालं समेट, शहनाजसाठी ठाम उभे राहिले

थोड्या दिवसांनी शहनाज आणि तिच्या वडिलांमधील वाद मिटला. जेव्हा सिद्धार्थ शुक्ला चा मृत्यू झाला तेव्हा संतोख सिंग यांनी शहनाजला खूप धीर दिला. सिद्धार्थला गमावल्यामुळे ते स्वतः दु:खी झाले होते, पण त्यांनी आपल्या मुलीची साथ सोडली नाही.