घराघरातून उजळल्या मंगलज्योती!
बुधवारच्या गोवत्सद्वादशीपासून दिवाळीला सुरुवात झाली असली तरी अनेक कुटुंबांमध्ये धनत्रयोदशीपासून दिवाळी साजरी करण्यात येते. आज, शुक्रवारी येणाऱ्या धनत्रयोदशीची चाहूल घेत घरांच्या खिडक्या, गॅलरी आकाशकंदिलांनी उजळून निघाल्या आहेत.
Maharashtra Times 28 Oct 2016, 12:24 pm
म. टा. खास प्रतिनिधी, मुंबई
बुधवारच्या गोवत्सद्वादशीपासून दिवाळीला सुरुवात झाली असली तरी अनेक कुटुंबांमध्ये धनत्रयोदशीपासून दिवाळी साजरी करण्यात येते. आज, शुक्रवारी येणाऱ्या धनत्रयोदशीची चाहूल घेत घरांच्या खिडक्या, गॅलरी आकाशकंदिलांनी उजळून निघाल्या आहेत. पारंपरिक आकाशकंदिलांसोबतच, विविधरंगी चांदण्या, फुलांचे आकार, दिवाळीनंतर लॅम्पशेड म्हणून घरात सजवता येतील, असे काचेचे कंदील घराघरांमध्ये सजले आहेत.
कंदील गल्ली, क्रॉफर्ड मार्केट, दादर मार्केट, मालाड, घाटकोपर मार्केट येथे घरोघरी तयार होणाऱ्या कंदिलांबरोबरच विशेष मुलांकडून बनवलेल्या पणत्या, तोरणे, कंदील, चॉकलेट, बिस्किट यांच्या खरेदीचे प्रमाणही हळुहळू वाढत आहे. रस्त्यारस्त्यांवर विविध महिला संघटना, आधारगट यांच्या फराळांचे स्टॉल्स दिसत आहेत. नोकरदार वर्गाकडून मोठ्या दुकानांबरोबरच घरगुती पद्धतीने बनवलेल्या फराळालाही मागणी आहे. सुका मेवा, मिठाई याबरोबरच चॉकलेट्सनाही वाढती मागणी असल्याचे मशिद बंदर येथील सुका मेव्याच्या व्यापाऱ्यांकडून सांगण्यात येत आहे. स्निग्ध पदार्थांचे प्रमाण आणि साखर कमी असलेली चॉकलेट्स आणि मिठाई घेऊन दिवाळीमध्ये फराळ, मिठाया आणि चॉकलेटचा भडीमार सहन करतही आरोग्यदायी दिवाळी साजरी करण्याचा ग्राहकांचा प्रयत्न असल्याचेही दिसते.
‘विशेष’ हातांच्या कलेला मागणी
दिवाळीच्या निमित्ताने शिवाजी पार्क येथील आव्हान पालक संघाच्या १६ मुली आणि २ मुलांनीही सुमारे ६०० मोत्यांची तोरणे, १५०० पणत्यांच्या जोड्या आणि हजाराहून जास्त ग्रीटिंग्ज बनवली आहेत. या वस्तूंच्या विक्रीतून विद्यार्थ्यांना दिवाळीसाठी पगाराव्यतिरिक्त ५०० रुपयांचा बोनस दिला जातो. गेल्या काही वर्षांमध्ये या विशेष मुलांनी बनवलेल्या वस्तूंची मागणी हळुहळू वाढताना दिसत आहे, असे आव्हान पालक संघच्या संचालिका वंदना कर्वे यांनी सांगितले.
महालक्ष्मी येथील ओम क्रीएशन्सच्या विशेष विद्यार्थ्यांनीही पणत्या, माळांची तोरणे, चॉकलेट्स बनवली आहेत. ओम क्रीएशन्सकडे दिवाळीच्या आधी बिस्किट्स, कुकीज आणि चॉकलेट्सची मोठी मागणी असते. इतर वेळी बाहेरून हे पदार्थ विकत घेणाऱ्या प्रियांका सूर्यवंशी यांनी यंदा आवर्जून या विद्यार्थ्यांनी बनवलेल्या वस्तू खरेदी केल्या आहेत. या माध्यमातून विद्यार्थ्यांना प्रोत्साहन मिळाल्याने मलाही आनंदच मिळाला, अशी प्रतिक्रिया त्यांनी दिली.
फटाक्यांबाबत जागरुकता
साधारणपणे दिवाळीची चाहूल विद्यार्थ्यांना शाळेच्या सुट्ट्या लागल्या की सुरू होणाऱ्या फटाक्यांच्या आवाजाने लागते. मात्र यंदा दिवाळीच्या आधी फटाके फोडण्याचे प्रमाण कमी जाणवत आहे, असे आवाज फाऊंडेशनच्या संस्थापिका सुमैरा अब्दुलली यांनी सांगितले. दिवाळी दरम्यान मोबाइल अॅपच्या माध्यमातून आवाजाचे प्रमाण तपासून हे प्रमाण १२५ डेसिबल्सच्या मर्यादेपलीकडे असेल, रात्री १०नंतरही फटाक्यांचा आवाज सुरू राहिला तर यासंदर्भात पोलिसांकडे १०० नंबरवर तक्रार करावी, असेही त्यांनी आवर्जून सांगितले. पोलिसांशी ईमेल किंवा ट्विटरच्या माध्यमातूनही संपर्क साधता येणार आहे.
बुधवारच्या गोवत्सद्वादशीपासून दिवाळीला सुरुवात झाली असली तरी अनेक कुटुंबांमध्ये धनत्रयोदशीपासून दिवाळी साजरी करण्यात येते. आज, शुक्रवारी येणाऱ्या धनत्रयोदशीची चाहूल घेत घरांच्या खिडक्या, गॅलरी आकाशकंदिलांनी उजळून निघाल्या आहेत. पारंपरिक आकाशकंदिलांसोबतच, विविधरंगी चांदण्या, फुलांचे आकार, दिवाळीनंतर लॅम्पशेड म्हणून घरात सजवता येतील, असे काचेचे कंदील घराघरांमध्ये सजले आहेत.
कंदील गल्ली, क्रॉफर्ड मार्केट, दादर मार्केट, मालाड, घाटकोपर मार्केट येथे घरोघरी तयार होणाऱ्या कंदिलांबरोबरच विशेष मुलांकडून बनवलेल्या पणत्या, तोरणे, कंदील, चॉकलेट, बिस्किट यांच्या खरेदीचे प्रमाणही हळुहळू वाढत आहे. रस्त्यारस्त्यांवर विविध महिला संघटना, आधारगट यांच्या फराळांचे स्टॉल्स दिसत आहेत. नोकरदार वर्गाकडून मोठ्या दुकानांबरोबरच घरगुती पद्धतीने बनवलेल्या फराळालाही मागणी आहे. सुका मेवा, मिठाई याबरोबरच चॉकलेट्सनाही वाढती मागणी असल्याचे मशिद बंदर येथील सुका मेव्याच्या व्यापाऱ्यांकडून सांगण्यात येत आहे. स्निग्ध पदार्थांचे प्रमाण आणि साखर कमी असलेली चॉकलेट्स आणि मिठाई घेऊन दिवाळीमध्ये फराळ, मिठाया आणि चॉकलेटचा भडीमार सहन करतही आरोग्यदायी दिवाळी साजरी करण्याचा ग्राहकांचा प्रयत्न असल्याचेही दिसते.
‘विशेष’ हातांच्या कलेला मागणी
दिवाळीच्या निमित्ताने शिवाजी पार्क येथील आव्हान पालक संघाच्या १६ मुली आणि २ मुलांनीही सुमारे ६०० मोत्यांची तोरणे, १५०० पणत्यांच्या जोड्या आणि हजाराहून जास्त ग्रीटिंग्ज बनवली आहेत. या वस्तूंच्या विक्रीतून विद्यार्थ्यांना दिवाळीसाठी पगाराव्यतिरिक्त ५०० रुपयांचा बोनस दिला जातो. गेल्या काही वर्षांमध्ये या विशेष मुलांनी बनवलेल्या वस्तूंची मागणी हळुहळू वाढताना दिसत आहे, असे आव्हान पालक संघच्या संचालिका वंदना कर्वे यांनी सांगितले.
महालक्ष्मी येथील ओम क्रीएशन्सच्या विशेष विद्यार्थ्यांनीही पणत्या, माळांची तोरणे, चॉकलेट्स बनवली आहेत. ओम क्रीएशन्सकडे दिवाळीच्या आधी बिस्किट्स, कुकीज आणि चॉकलेट्सची मोठी मागणी असते. इतर वेळी बाहेरून हे पदार्थ विकत घेणाऱ्या प्रियांका सूर्यवंशी यांनी यंदा आवर्जून या विद्यार्थ्यांनी बनवलेल्या वस्तू खरेदी केल्या आहेत. या माध्यमातून विद्यार्थ्यांना प्रोत्साहन मिळाल्याने मलाही आनंदच मिळाला, अशी प्रतिक्रिया त्यांनी दिली.
फटाक्यांबाबत जागरुकता
साधारणपणे दिवाळीची चाहूल विद्यार्थ्यांना शाळेच्या सुट्ट्या लागल्या की सुरू होणाऱ्या फटाक्यांच्या आवाजाने लागते. मात्र यंदा दिवाळीच्या आधी फटाके फोडण्याचे प्रमाण कमी जाणवत आहे, असे आवाज फाऊंडेशनच्या संस्थापिका सुमैरा अब्दुलली यांनी सांगितले. दिवाळी दरम्यान मोबाइल अॅपच्या माध्यमातून आवाजाचे प्रमाण तपासून हे प्रमाण १२५ डेसिबल्सच्या मर्यादेपलीकडे असेल, रात्री १०नंतरही फटाक्यांचा आवाज सुरू राहिला तर यासंदर्भात पोलिसांकडे १०० नंबरवर तक्रार करावी, असेही त्यांनी आवर्जून सांगितले. पोलिसांशी ईमेल किंवा ट्विटरच्या माध्यमातूनही संपर्क साधता येणार आहे.