दिवाळीत आपुला गाव बरा!

बाहेरगावहून मुंबईत आलेले अनेक कलाकार इंडस्ट्रीत काम करतायत. दिवाळीसारखा सण जवळ आला, की त्यांनाही आपल्या घरचे वेध लागतात. बिझी शेड्यूलमधून वेळात वेळ काढून ही मंडळी सणाचा आनंद घेण्यासाठी घर गाठतात…

आईच्या हातचा फराळ
वर्षभर शूटिंगच्या धावपळीमुळे घरी जाता येत नाही. पण दिवाळी मात्र घरच्यांबरोबर साजरी करण्याचा प्रयत्न असतो. मागच्या वर्षी दोन दिवसच जळगावला घरी जाता आलं होतं. यंदा मात्र चार दिवस घरी जाणार आहे. वर्षभर आईच्या हातचं खाणं मिळत नाही. दिवाळीत मात्र आईने बनवलेले पदार्थ खायला मिळतात. तिथून परत येताना आईने केलेला भरपूर फराळ मुंबईत येताना बरोबर घेऊन येते. दिवाळीला घरी गेल्यावर सगळे नातेवाईक भेटत असल्याने मस्त वाटतं.
- सुरभी हांडे, अभिनेत्री

मी किल्लेदार
दिवाळीत दरवर्षी न चुकता मी किल्ला बनवतो. यंदाही मी पुण्याच्या घरी किल्ला बनवणार आहे. मुंबईतल्या माझ्या स्वतःच्या घरातली ही पहिलीच दिवाळी असल्याने माझ्यासाठी ही खास आहे. यंदा मुंबई आणि पुण्यात असं दोन्हीकडे दिवाळी साजरी करणार आहे. दिवाळीत फटाके वाजवणं टाळतो. यावर्षी दिवाळीमध्ये नातेवाईक, जवळच्या व्यक्तींना पुस्तकं भेट द्यायचा माझा विचार आहे.
- सुयश टिळक, अभिनेता

वर्षाआड नागपूरची वारी
दिवाळीला दरवर्षी नागपूरला जाणं शक्य होत नाही. मग एक वर्ष मी तिथे जाते आणि एक वर्ष नागपूरहून माझे आई-बाबा, सासू-सासरे मुंबईत येतात. यंदा ते मुंबईत येणार आहेत. आम्ही एकत्र येऊन उत्साहात दिवाळी साजरी करतो. जमेल तसा सगळा फराळ आम्ही घरीच बनवतो. पाडवा आणि भाऊबीज हे दोन दिवस आमच्याकडे महत्त्वाचे असतात. आणि हो, दिवाळी कितीही उत्साहात साजरी केली तरी फटाके मात्र आम्ही वाजवत नाही.
- समिधा गुरू, अभिनेत्री

- दीपश्री आपटे, कॉलेज क्लब रिपोर्टर