पहिल्या चर्चेत हिलरींचं पारडं जड

मटा ऑनलाइन वृत्त । न्यूयॉर्क

अमेरिकेच्या अध्यक्षपदाच्या निवडणुकीसाठी झालेल्या पहिल्या जाहीर चर्चेनंतर केलेल्या जनमतचाचणीत डेमोक्रेटिक पक्षाच्या उमेदवार हिलरी क्लिंटन यांचं पारडं जड ठरलं आहे. हिलरी यांच्या बाजुनं ६२ टक्के मतदारांनी तर रिपब्लिकन पक्षाचे उमेदवार डोनाल्ड ट्रम्प यांना २७ टक्के मतदारांनी कौल दिला आहे.

सीएनएन/ओआरसीने हे सर्वेक्षण केलं आहे. ज्या अमेरिकी नागरिकांनी ही जाहीर चर्चा ऐकली, त्यांच्याकडून मते जाणून घेण्यात आली. हिलरी यांनी या चर्चेत आपली मतं अधिक स्पष्ट आणि प्रभावीपणे मांडली. त्यांना समस्यांची जाण अधिक आहे असं या ६२ टक्के नागरिकांना वाटतं. परराष्ट्र धोरण आणि दहशतवादाच्या मुद्द्यावर हिलरी यांनी चर्चेत मांडलेल्या मुद्द्यांना नागरिकांनी अधिक पसंती दर्शवली तर आर्थिक धोरणांसंदर्भातल्या मुद्द्यांवर हिलरी-५१ टक्के आणि ट्रम्प-४७ टक्के अशी कॉंटे की टक्कर होती.