जपान ओपन
वृत्तसंस्था, टोकियो
जपान ओपन बॅडमिंटन स्पर्धेला आजपासून (मंगळवार) सुरुवात होत असून, या स्पर्धेत भारताची मदार पी. व्ही. सिंधूवर असणार आहे. मागील काही स्पर्धांमध्ये सिंधूला उपविजेतेपदावरच समाधान मानावे लागले आहे. त्यामुळे या वेळी तरी सिंधू हा अडथळा पार करणार का, याबाबत उत्सुकता आहे. दुसरीकडे, सायना नेहवाल आणि साई प्रणीत यांनी मात्र स्पर्धेतून माघार घेतली आहे.
सिंधूसाठी हे वर्षे तसे आतापर्यंत चांगलेच गेले आहे. गोल्ड कोस्ट राष्ट्रकुल स्पर्धा, जागतिक अजिंक्यपद स्पर्धा आणि जकार्ता एशियाडमध्ये तिने रौप्यपदक मिळवले आहे. या मोसमात ती सातत्याने खेळत आहे. त्यामुळे व्यग्र वेळापत्रकाचाही तिला फटका बसत आहे. ऑलिम्पिक रौप्यपदक विजेती सिंधू त्यामुळेच अंतिम फेरीचा अडथळा पार करण्यात यशस्वी ठरत नसल्याचेही बोलले जात आहे. जपान ओपनमध्ये २३ वर्षीय सिंधूची लढत जपानच्या सायाका ताकाहाशीविरुद्ध होईल. सिंधूने आगेकूच कायम राखल्यास उपांत्यपूर्व फेरीत तिची लढत वर्ल्ड चॅम्पियन कॅरोलिन मरीन किंवा अकाने यामागुचीविरुद्ध होणार आहे.
पुरुष एकेरीत किदाम्बी श्रीकांत आणि एच. एस. प्रणॉय यांच्याकडून चांगल्या कामगिरीची अपेक्षा आहे. जागतिक अजिंक्यपद आणि आशियाई क्रीडा स्पर्धेमध्ये या दोघांनीही निराशा केली आहे. या मोसमात श्रीकांतची सर्वोत्तम कामगिरी मलेशिया ओपनमध्ये झाली आहे. या स्पर्धेत त्याने उपांत्य फेरी गाठली होती. त्याची सलामीची लढत चीनच्या हुअँग युशिअँगविरुद्ध होईल, तर प्रणॉयचा सामना जोनाथन ख्रिस्टीविरुद्ध होईल. हैदराबाद ओपन जिंकणाऱ्या समीर वर्माची लढत कोरियाच्या ली डाँग केयूनविरुद्ध होईल. दुहेरीत सात्विकसाईराज रांकीरेड्डी-चिराग शेट्टी, मनू अत्री-बी. सुमीत रेड्डी, अश्विनी पोनप्पा-एन. सिक्की रेड्डी, प्रणव चोप्रा-एन. सिक्की रेड्डी, सात्विक -अश्विनी अशा जोड्या सहभागी होत आहेत.