मिरखाम (कॅनडा) : भारताला वर्ल्ड ज्युनियर बॅडमिंटन अजिंक्यपद स्पर्धेतील मिश्र सांघिकच्या उपांत्यपूर्व फेरीत दक्षिण कोरियाकडून १-३ असा पराभव पत्करावा लागला. यात लक्ष्य सेनने झुंजार खेळ केला. मात्र, इतरांनी निराशा केली.
मिश्र दुहेरीत तनिषा क्रास्टो-ध्रुव कपिला जोडीला कोरियाच्या ना एयून जेआँग-चॅन वांग जोडीकडून २२-२०, १४-२१, १२-२१ असा पराभव पत्करावा लागला. यानंतर एशियन ज्युनियर चॅम्पियन लक्ष्यकडून मोठ्या अपेक्षा होत्या. त्याने एकेरीत जी हून चोईला १६-२१, २१-१८, २१-१२ असे पराभूत करून भारताला बरोबरी साधून दिली होती. पहिल्या गेममध्ये लक्ष्यला सूर गवसला नाही. मात्र, दुसऱ्या गेममध्ये त्याने चोईच्या तोडीस तोड खेळ केला आणि ही गेम जिंकून बरोबरी साधली. आत्मविश्वास उंचावलेल्या लक्ष्यने तिसऱ्या गेममध्ये चोईला संधीच दिली नाही. यानंतर मुलांच्या दुहेरीत ताए याग शिन-चॅन वांग जोडीने कृष्णा पसाद गरगा-ध्रुव कपिला जोडीवर १९-२१, २१-१९, २१-११ अशी मात केली. मुलींच्या एकेरीत गा एयून पार्कने मालविका बनसोडला २१-१७, २१-१२ असे सहज पराभूत केले आणि कोरियाला ३-१ असा विजय मिळवून दिला. यानंतर क्रमांकासाठीच्या लढतीत भारताने डेन्मार्कवर ३-१ने मात केली. क्रमांकासाठीच्या लढतीत शनिवारी भारताची मलेशियाविरुद्ध लढत होईल. वैयक्तिक लढतींना ११ नोव्हेंबरपासून सुरुवात होईल.