थॉमस आणि उबेर कप बॅडमिंटन स्पर्धा
वृत्तसंस्था, बँकॉक
भारताच्या पुरुष आणि महिला संघाला थॉमस आणि उबेर कप बॅडमिंटन स्पर्धेत विजयाने सुरुवात करण्यात अपयश आले. थॉमस कपमध्ये भारतीय पुरुष संघाला फ्रान्सकडून १-४ असा, तर उबेर कपमध्ये महिला संघाला कॅनडाकडून १-४ असा पराभव पत्करावा लागला.
भारताला थॉमस कपमध्ये जागतिक क्रमवारीत नवव्या स्थानी असलेल्या एच. एस. प्रणॉय आणि मनू अत्री-बी. सुमीत रेड्डी जोडीला समाविष्ट न केल्याचा फटका बसला. थॉमस कपमध्ये 'अ' गटात बी. साईप्रणीतने ब्रिस लेव्हरडेझला २१-७, २१-१८ असे पराभूत करून भारताला १-० अशी आघाडी मिळवून दिली होती. मात्र, या चांगल्या सुरुवातीचा फायदा भारताला घेता आला नाही. दुहेरीत अर्जुन एम. आर. - रामचंद्रन श्लोक जोडीला बॅस्टियन केरसौडी-ज्युलियन माओ जोडीकडून १३-२१, १६-२१ असा पराभव पत्करावा लागला. अर्जुन-श्लोक जागतिक क्रमवारीत ३८व्या स्थानी असून, बॅस्टियन-ज्युलियन जोडीने ४७व्या स्थानावर आहे. यानंतर जागतिक क्रमवारीत २१व्या स्थानावर असणाऱ्या समीर वर्माकडे भारताला पुन्हा आघाडी मिळवून देण्याची जबाबदारी होती. मात्र, जागतिक क्रमवारीत ४३व्या स्थानावर असणाऱ्या लुकास कोर्व्हीने समीर वर्माचे आव्हान २१-१८, २०-२२, २१-१८ असे परतवून लावले. ही लढत एक तास चालली. यानंतर दुहेरीत थॉम-रोनन लाबर जोडीने अरुण जॉर्ज- एस. शुक्ला जोडीवर २१-१०, २१-१२ अशी मात करून फ्रान्सला ३-१ अशी विजयी आघाडी मिळवून दिली. एकेरीतील अखेरच्या लढतीत लक्ष सेनने चांगली लढत दिली. मात्र, टोमा ज्युनिअर पोपोवने त्याच्यावर २२-२०, १९-२१, २१-१९ असा विजय मिळवला. भारताची आता सोमवारी ऑस्ट्रेलियाविरुद्ध लढत होईल.
साईनाचा पराभव
उबेर कपमध्ये 'अ' गटात एकेरीतील सलामीच्या लढतीत मिचेल ली हिने साईना नेहवालचे आव्हान १५-२१, २१-१६, २१-१६ असे परतवून लावले आणि कॅनडाला आघाडी मिळवून दिली. जागतिक क्रमवारीत ली १४व्या स्थानावर असून, साईना दहाव्या स्थानावर आहे. मागील दोन्ही लढतींत साईनाने लीला पराभूत केले होते. या वेळी मात्र, पहिली गेम जिंकूनही साईनाला विजय मिळवण्यात यश आले नाही. यानंतर राचेल होडेरिचने वैष्णवी रेड्डीला २१-११, २१-१३ असे पराभूत केले. दुहेरीत जे. मेघना-पूर्वीशा एस. राम जोडीने मिचेल टाँग-जोसेफिन वू जोडीवर २१-१९, २१-१५ अशी मात करून भारताचे आव्हान राखले. यानंतर ब्रिटनी टॅमने श्रीकृष्ण प्रियाला २१-११, २१-१५ असे नमवून कॅनडाचा विजय निश्चित केला. अखेरच्या दुहेरीच्या लढतीत रॅचेल-क्रिस्टेन जोडीने संयोगिता घोरपडे-प्राजक्ता सावंत जोडीवर २१-१५, २१-१६ अशी मात केली. भारतीय महिलांची आता ऑस्ट्रेलियाविरुद्ध लढत होईल.