साईना, श्रीकांत सलामीलाच गारद
पी. व्ही. सिंधूची विजयी सलामी; साई प्रणीतही पराभूत
इंडोनेशिया मास्टर्स
वृत्तसंस्था, जकार्ता
भारताच्या पी. व्ही. सिंधूने इंडोनेशिया मास्टर्स बॅडमिंटन स्पर्धेत विजयी सलामी दिली. मात्र, साईना नेहवाल, बी. साई प्रणीत, किदाम्बी श्रीकांत, सौरभ वर्मा यांना पहिल्याच फेरीतून गाशा गुंडाळावा लागला.
महिला एकेरीच्या सलामीच्या लढतीत पाचव्या मानांकित पी. व्ही. सिंधूने जपानच्या अया ओहोरीवर १४-२१, २१-१५, २१-११ अशी मात केली. ही लढत जवळपास तासभर चालली. जागतिक क्रमवारीत सहाव्या स्थानावर असणाऱ्या सिंधूचा हा अयावरील सलग दहावा विजय ठरला. सिंधूला पहिल्या गेममध्ये संघर्ष करावा लागला. यानंतर तिने दुसऱ्या आणि तिसऱ्या गेममध्ये अयाला फारशी संधी दिली नाही आणि सफाईदार खेळ करून दुसरी फेरी गाठली. खरे तर सिंधूची दुसऱ्या फेरीत गतविजेत्या साईनाशी लढत होण्याची शक्यता होती. मात्र, साईनाला पहिल्याच फेरीतून गाशा गुंडाळावा लागला. जपानच्या सायाका ताकाहाशीने साईनाचे आव्हान १९-२१, २१-१३, २१-५ असे परतवून लावले. ही लढत ५० मिनिटे चालली. जागतिक क्रमवारीत साईना अकराव्या, तर सायाका चौदाव्या स्थानावर आहे. साईनाने मागील सहा पैकी चार लढतींत सायाकाला नमविले होते. मात्र, मागील वर्षी दोन वेळा सायाकाने साईनाला नमविले होते. सायाकाचा हा साईनावरील सलग तिसरा विजय ठरला.
पुरुष एकेरीत इंडोनेशियाच्या शेसार हिरेन हुस्तावितोने श्रीकांतचे आव्हान १८-२१, २१-१२, २१-१४ असे परतवून लावले. ही लढत एक तास अन् तीन मिनिटे चालली. शेसरचा हा श्रीकांतवरील सलग तिसरा विजय ठरला. चीनच्या लू गुअँग झू जोडीने सौरभ वर्माचे आव्हान १७-२१, २१-१५, २१-१० असे परतवून लावले. यानंतर बी. साई प्रणीतने आठव्या मानांकित चीनच्या शि यू कि याला चांगली लढत दिली. बी. साई प्रणीतने पहिली गेम जिंकून आक्रमक सुरुवात केली होती. मात्र, यानंतर शि यू किने त्याला संधी दिली नाही. शि यू किने ही लढत १६-२१, २१-१८, २१-१० अशी जिंकली. जागतिक क्रमवारीत नवव्या स्थानावर असणाऱ्या शि यू किचा हा साई प्रणीतवरील सलग चौथा विजय ठरला.
मिश्र दुहेरीत कोरियाच्या को सुंग ह्यून-एओम हे वोन या जोडीने प्रणव चोप्रा-एन. सिक्की रेड्डी जोडीवर २१-८, २१-१४ अशी मात केली.