हाँगकाँग ओपन बॅडमिंटन स्पर्धा
हाँगकाँग : भारताच्या किदाम्बी श्रीकांतचे हाँगकाँग ओपन बॅडमिंटन स्पर्धेतील आव्हान संपुष्टात आले. पुरुष एकेरीच्या उपांत्य फेरीत हाँगकाँगच्या ली चेयूक यियूने श्रीकांतवर २१-९, २५-२३ अशी मात केली.
पहिल्या गेममध्ये ब्रेक झाला तेव्हा लीने ११-३ अशी आघाडी घेतली होती. ब्रेकनंतर श्रीकांतने प्रतिकार केला. मात्र, आघाडी कायम राखत लीने पहिल्या गेममध्ये बाजी मारली. आव्हान राखण्यासाठी श्रीकांतला दुसरा गेम जिंकणे गरजेचे होते. ब्रेक झाला तेव्हा श्रीकांतने ११-८ अशी आघाडीही घेतली होती. ब्रेकनंतर पाहता पाहता श्रीकांतने २०-१५ अशा आघाडीसह पाच गेम पॉइंट मिळविले. मात्र, ही संधी श्रीकांतला साधता आली नाही.
महिला एकेरीत थायलंडच्या रॅचनोक इन्टॅननने अंतिम फेरी गाठली. उपांत्य फेरीत पाचव्या मानांकित इन्टॅननने जपानच्या द्वितीय मानांकित अकेन यामागुचीवर २१-२३, २१-१५, २१-१२ अशी मात केली. इन्टॅननची आता विजेतेपदासाठी चीनच्या चेन यू फेइशी लढत होईल. तिसऱ्या मानांकित चेन यू फेइने मलेशियाच्या झँग बेइवेनला २१-१८, १४-२१, २१-१५ असे पराभूत केले.