म.टा. क्रीडा प्रतिनिधी, नागपूर
नागपूर जिल्हा बॅडमिंटन संघटनेच्यावतीने व भगिनी मंडळाच्या यजमानपदाखाली घेण्यात आलेल्या सबज्युनिअर बॅडमिंटन स्पर्धेत क्रिशा सोनी, आसावरी खांडेकर आणि देवेश जेना यांनी विविध गटात दुहेरी विजेतेपद पटकावण्याची कामगिरी केली.
धनवटे नॅशनल कॉलेजच्या इनडोअर स्टेडियममधील बॅडमिंटन कोर्टवर झालेल्या स्पर्धेत १३ वर्षांखालील मुलींच्या एकेरी व दुहेरी क्रिषा सोनीने विजेतेपद पटकावले. एकेरीतील अव्वल मानांकित क्रिषा सोनीने प्रतिस्पर्धी बिगर मानांकित निशिखा गोखेचा चुरशीच्या लढतीत तीन गेममध्ये पराभव केला. विशेष म्हणजे क्रिशाने लढतीतील पहिला गेम २२-२० अशा फरकाने गमावला. मात्र, त्यानंतरच्या दोन्ही गेममध्ये जोरदार पुनरागमन करत २१-९, २१-७ असे सलग दोन गेम जिंकत विजेतेपद पटकावले. त्यानंतर दुहेरीत क्रिशा व निशिका गोखे या जोडीने अन्वी राऊत मन्वी फुंडे या जोडीचा २१-१५, २१-१४ असा पराभव करत स्पर्धेतील दुहेरी विजेतेपद पूर्ण केले. दुसरीकडे १५ वर्षांखालील मुलांच्या एकेरीत अव्वल मानांकित देवेश जेनाने द्वितीय मानांकित सान्विक चौधरीचा २१-१४, १७-२१, २१-५ असा पराभव करत विजेतेपद पटकावले. तर देवेश व सान्विक जोडीने दुहेरीत आर्यन मांडवगणे व चैतन्य चौधरी जोडीचा २१-१३, २१-१८ असा पराभव करत दुहेरी विजेतेपद पूर्ण केले.
१५ वर्षांखालील मुलींच्या गटात अव्वल मानांकित आसावरी खांडेकरने द्वितीय मानांकित पिनाक रोकडे हिचा २१-१४, १५-२१ आणि २१-१३ असा चुरशीच्या लढतीत पराभव करत विजेतेपद पटकावले. तर दुहेरीच्या अंतिम फेरीत आसावरी व निकिता जोसेफ या जोडीने मृण्मयी पांडे आणि सृष्टी काणे जोडीचा २१-९, २१-१२ असा पराभव करीत दुहेरी विजेतेपद पटकावले. त्यापूर्वी १० वर्षांखालील मुलांच्या गटात बिगर मानांकित आयुष अडेने स्पर्धेतील अव्वल मानांकित साईराज नायसेचा तीन गेममध्ये १६-२१, २१-१३, २१-१२ असा धक्कादायक पराभव करत स्पर्धेचे विजेतेपद पटकावले. तर मुलींच्या गटात अव्वल मानांकित फिज अकबानीने प्रतिस्पर्धी आर्या भुजाडेचा २१-१३, २१-११ असा पराभव केला.
स्पर्धेतील निकाल (अंतिम फेरी)
१३ वर्षांखालील मुले एकेरी : आदित्य अडे मात अमेय नाकतोडे २१-१४, २१-१९.
१३ वर्षांखालील मुले (दुहेरी) : जीवा पिल्लेई आणि वरुण कोलते मात आदित्य गाडगे आणि अमेय नाकतोडे २१-१५, २१-१२.