सिंधू, सायना, साई गारद

इन्चॉन: भारताचा अनुभवी बॅडमिंटनपटू परुपल्ली कश्यपने कोरिया ओपन बॅडमिंटन स्पर्धेच्या उपउपांत्यपूर्व फेरीत प्रवेश केला आहे; पण बुधवारचा दिवस भारताच्या इतर बॅडमिंटनपटूंसाठी विस्मरणीयच होता. जगज्जेत्या सिंधूने मॅच पॉईंट गमावत, पराभव ओढावून घेतला. तर सायना नेहवाल, साईप्रणीत यांना दुखापतीमुळे लढत अर्धवट सोडावी लागली. पुरुष एकेरीत कश्यपने तैपईच्या ल्यू चिया हन्ग याच्यावर २१-१६, २१-१६ अशी मात करत आगेकूच केली. पुढील फेरीत कश्यपचा सामना होईल तो मलेशियाच्या ल्यू डारेनेशी.

सिंधूचा पराभव मात्र जिव्हारी लागणारा होता. अमेरिकेच्या बीवन झँगने सिंधूची झुंज ७-२१, २४-२२, २१-१५ अशी मोडून काढली. तीन गेममध्ये पण नव्हे. अगदी सहज दोन गेममध्येच झुंज जिंकण्याची संधी सिंधूला होती. मात्र मूळची चिनी असणारी आणि आता अमेरिकेची नागरिक झालेल्या झँगने संयम राखत खेळ केला अन् सिंधूविरुद्धच्या सलग तीन पराभवांनंतर पहिल्यांदा तिच्याविरुद्धची लढत जिंकली.

साई, सायनाला दुखापत

जागतिक स्पर्धेत पदकाची कमाई करणाऱ्या बी साईप्रणीतनेही पुरुष एकेरीच्या आपल्या सलामीच्या लढतीतून दुखापतीमुळे माघार घेतली. डेन्मार्कच्या अँडर्स अँटोनसनविरुद्ध ९-२१, ७-११ असा मागे पडला असताना साईची दुखापत बळावली अन् त्याने माघार घेण्याचा निर्णय घेतला. साईप्रणीतप्रमाणेच भारताच्या सायना नेहवाललाही दुखापतीमुळे लढत सोडावी लागली. दक्षिण कोरियाच्या किम गा इयूनविरुद्ध सायनाने पहिला गेम १९-२१ असा गमावला, तर दुसरा गेम २१-१८ असा जिंकला. तिसऱ्या गेममध्ये सायना १-८ अशी पिछाडीवर पडली होती. मात्र दुखापतीचा 'खो' बसल्याने तिने सामना सोडला.

दुहेरीत अपयशी झुंज

पुरुष दुहेरीत मनू अत्री आणि बी सुमीत रेड्डी यांचे आव्हान चीनच्या हुआंग काय झियांग-ल्यू चेंग यांनी १६-२१, २१-१९, १८-२१ असे परतवून लावले. सात्विकसाईराज रांकीरेड्डी आणि चिराग शेट्टी या भारताच्या जोडीने जागतिक रँकिंगमध्ये चौथ्या क्रमांकावर असलेल्या जोडीला तोडीची लढत दिली. मात्र जपानच्या किगो सोंडा-ताकेशी कामुरा यांनी सात्विक-चिरागची झुंज २१-१९, १८-२१, २१-१८ अशी मोडून काढली. दुसरा गेम जिंकून लढतीत बरोबरी साधणारे सात्विक-चिराग निर्णायक गेममध्ये ११-१० असे आघाडीवर होते; पण अनुभव सरस ठरला अन् सोंडा-कामुरा यांनी आगेकूच केली.

दृष्टीक्षेप

१)२४ वर्षांच्या सिंधूला जगज्जेतेपद लाभल्यानंतर सलग दोन स्पर्धांमध्ये झटपट गाशा गुंडाळावा लागला आहे. गेल्याच आठवड्यात चीन ओपन आणि आता कोरिया ओपन स्पर्धेतूनही सिंधूला झटपट गाशा गुंडाळावा लागला आहे. चायना ओपन स्पर्धेच्या दुसऱ्या फेरीत थायलंडच्या पोर्नपावी चोचूवांगने सिंधूला नमवले होते.

२) सिंधूप्रमाणेच सायनालाही सलग दुसऱ्या बॅडमिंटन स्पर्धेतून झटपट गाशा गुंडाळावा लागला आहे. चायना ओपन आणि आता कोरिया अशा दोन्ही स्पर्धेत तिचा निभाव लागला नाही.