म. टा. क्रीडा प्रतिनिधी, नागपूर
महाराष्ट्र राज्य बॅडमिंटन संघटनेच्या वतीने पुणे येथे संपलेल्या १३ वर्षांखालील मुले व मुलींच्या बॅडमिंटन स्पर्धेत मुलींच्या १३ वर्षांखालील गटात नागपूरच्या क्रिषा सोनी व तिची सहकारी कुंजल मंडलिक या स्पर्धेतील द्वितीय मानांकित जोडीला उपविजेतेपदावर समाधान मानावे लागले.
स्पर्धेच्या शेवटच्या दिवशीच्या झालेल्या दुहेरीच्या अंतिम लढतीत अव्वल मानांकित जोडी श्रावणी वाळेकर आणि तारिणी सुरी जोडीने द्वितीय मानांकित क्रिषा सोनी व कुंजल मंडलिक या जोडीचा २१-१५, २१-१६ असा सहज पराभव करत विजेतेपद पटकावले. दोन्ही गेममध्ये क्रिषा व कुंजल मंडलिक यांनी अव्वल मानांकित जोडीचा प्रतिकार करण्याचा प्रयत्न केला. मात्र, निर्णायक क्षणी श्रावणी व तारिणी यांनी गुण नोंदवत विजेतेपद पटकावले. दुसरीकडे याच वयोगटात मुलींच्या एकेरीत श्रावणी वाळेकर हिने द्वितीय मानांकित नैशा भातोयेचा २१-१४, २१-१३ असा सहज पराभव करत स्पर्धेत दुहेरीत विजेतेपद पटकावले.
मुलांच्या एकेरीत १३ वर्षांखालील गटात सर्वेश यादवने दोन गेममध्ये प्रतिस्पर्धा आदित्य त्रिपाठीचा २२-२०, २१-१७ असा पराभव केला. तर दुबेरीत द्वितीय मानांकित जोडी अर्जुन भगत आणि यशराज कदम जोडीने प्रतिस्पर्धी ऋषिकेश जयदेवकर आणि सर्वेश यादव जोडीचा २१-१६,२१-१४ असा पराभव करत विजेतेपद पटकावले. १० वर्षांखालील मुलांच्या एकेरीत अव्वल मानांकित यश सिन्हाने द्वितीय मानांकित सचेत त्रिपाठीचा २१-१५, २१-१३ असा पराभव केला.
............