बासेल (स्वित्झर्लंड)ः भारताच्या मानसी जोशी आणि प्रमोद भगत यांनी जागतिक पॅरा-बॅडमिंटन अजिंक्यपद स्पर्धेत विजेतेपद पटकावले. महिलांच्या एकेरीच्या (एसएल३) अंतिम लढतीत मानसीने अनुभवी पारुल परमारवर २१-१२, २१-७ अशी सरळ गेममध्ये मात करत विश्वविजेतेपदावर नाव कोरले. मानसीचे हे या स्पर्धेतील पहिलेच विजेतेपद आहे. पुरुष एकेरीच्या (एसएल ३) अंतिम लढतीत अव्वल मानांकित प्रमोद भगत यांनी इंग्लंडच्या डॅनिएल बेथेलवर ६-२१, २१-१४, २१-५ अशी मात केली.
मानसीला २०११मध्ये अपघात झाला होता आणि त्यामध्ये तिला डावा पाय गमवावा लागला होता. त्यानंतर तिने गोपीचंद अकादमीमध्ये प्रवेश केला आणि खेळावर लक्ष केंद्रीत केले. सरावाविषयी बोलताना ती म्हणाली, 'दिवसात तीन सत्रांमध्ये सराव करताना, अतिशय खडतर प्रशिक्षण घेतले. या काळामध्ये मी फिटनेसवर लक्ष केंद्रीत केले होते. वजन कमी करताना, स्नायूंची ताकद वाढविण्यावर भर दिला. यासाठी जिममध्ये जास्तीत जास्त काळ घालविण्यासाठी आठवड्यातील सहा सत्रे व्यायाम केला. मी २०१५पासून पॅराबॅडमिंटन खेळत असून, आंतरराष्ट्रीय स्तरावर पदक जिंकण्याचे स्वप्न आता पूर्ण झाले आहे. स्ट्रोकमधील ताकद वाढविण्यावर आम्ही लक्ष दिले होते. अकादमीमध्ये मी दररोज सराव सामने खेळत होतो आणि आता प्रगती दिसून येत आहे.' जर्मनीची माजी टेनिसपटू स्टेफी ग्राफ ही तिची आदर्श आहे.
भारतीय संघाचे प्रशिक्षक गौरव खन्ना यांनीही मानसीचे कौतुक करताना, नव्या युगाची सुरुवात होत असल्याचे म्हटले आहे. 'पारुल यांचे अनेक वर्षांपासून एकहाती वर्चस्व होते. मात्र, आता त्या ४६ वर्षांच्या असून, त्यांच्यासमोर आता एका तरुण खेळाडूचे आव्हान उभे राहिले आहे,' अशी प्रतिक्रिया त्यांनी दिली.
दरम्यान, एसएल३-४ प्रकारातील पुरुषांच्या दुहेरीमध्ये भारताच्या प्रमोद भगत आणि मनोज सरकार या जोडीला भारताच्याच नितेश कुमार आणि तरुण धिल्लन यांच्याकडून १४-२१, २१-१५, २१-१६ असा प्रभाव स्वीकारावा लागला.
पुरुषांच्या 'एसएल४'मध्ये भारताच्या तरुणला उपविजेतेपदावर समाधान मानावे लागले. अंतिम लढतीत फ्रान्सच्या ल्यूकास माझूरविरुद्ध तरुणने १४-१३ अशी आघाडी घेतली होती. मात्र, त्यानंतर तरुणने लढत सोडली.