'एमसीए'ची निवडणूक
२ ऑक्टोबरला
म. टा. प्रतिनिधी, पुणे
महाराष्ट्र क्रिकेट संघटनेची (एमसीए) निवडणूक जाहीर झाली असून, येत्या २ ऑक्टोबरला ही निवडणूक होणार आहे, अशी घोषणा राज्याचे माजी निवडणूक आयुक्त आणि निवडणूक अधिकारी जगेश्वर सहारिया यांनी केली.
निवडणूक कार्यक्रम सहारिया यांनी जाहीर केला आहे. त्यानुसार, १६४ मतदारांची यादी जाहीर करण्यात आली असून, शुक्रवारी सायंकाळी (२७ सप्टेंबर) पाच वाजेपर्यंत हरकती आणि सूचना घेतल्या जाणार आहेत. मतदारांची अंतिम यादी २८ सप्टेंबरला सकाळी साडेदहा जाहीर करण्यात येणार आहे. शिखर परिषदेच्या १८ सदस्यपदांसाठी २८ सप्टेंबर रोजी सकाळी अकरापासून ते २९ सप्टेंबर रोजी सायंकाळी पाचपर्यंत उमेदवारी अर्ज दाखल करता येणार आहे. अर्जांची छाननी ३० सप्टेंबरला होईल, छाननीनंतर त्याच दिवशी पात्र उमेदवारांची यादी प्रसिद्ध केली जाणार आहे. त्यानंतर अर्ज मागे घेण्यासाठी दोन तासांचा अवधी असणार आहे. त्यानंतर लगेचच उमेदवारांची अंतिम यादी प्रसिद्ध केली जाणार आहे. २ ऑक्टोबरला सकाळी नऊ ते दुपारी दोनदरम्यान मतदान होईल, त्यानंतर मतमोजणी होईल आणि शिखर परिषदेच्या १८ सदस्यांची निवड होईल. त्यानंतर सर्वसाधारण सभा होईल, त्यात विविध पाच पदांसाठी मतदान होईल. त्याच दिवशी मतमोजणीनंतर सायंकाळी निकालाची घोषणा केली जाणार आहे.