जेतेपदाने आत्मविश्वास उंचावला: कौशल धर्मामेर

नवी दिल्ली : दोन वर्षांपूर्वी बॅडमिंटनपटू कौशल धर्मामेर गुडघ्याच्या दुखापतीमुळे त्रस्त होता. त्याची कारकीर्द जवळपास संपुष्टात आल्यात जमा होती. मात्र, या दुखापतींतून सावरत त्याने नुकतेच म्यानमार इंटरनॅशनल सीरिज ट्रॉफी उंचावली. या विजेतेपदाने आत्मविश्वास उंचावल्याची प्रतिक्रिया कौशलने दिली.

त्याने या स्पर्धेत इंडोनेशियाच्या कारोनोवर १८-२१, २१-१४, २१-११ अशी मात केली. 'माझ्यासाठी हे विजेतेपद खास आहे. आंतरराष्ट्रीय स्तरावर खेळण्यासाठी मी सज्ज आहे, हा आत्मविश्वास मला यातून मिळाला. मागील काही वर्षांत झालेल्या दुखापतीने मी निराश झालो होतो,' असे कौशल म्हणाला. या वर्षी झालेल्या वरिष्ठ गटाच्या राष्ट्रीय बॅडमिंटन स्पर्धेत कौशलने ब्राँझपदक मिळवले होते. आई-वडिलांना खेळताना बघून कौशलला बॅडमिंटनमध्ये आवड निर्माण झाली. सहाव्या वर्षीच तो उन्हाळी शिबिरात दाखल झाला. लहान वयातच तो बॅडमिंटनमध्ये चमक दाखवू लागला. मात्र, २०१६ पासून त्याला विविध दुखापतींचा सामना करावा लागला. कौशल उदय पवार बॅडमिंटन अॅकॅडमीत सराव करतो. सध्या तो जागतिक क्रमवारीत १८७व्या स्थानावर आहे.