सबज्युनिअर व मास्टर्स बॅडमिंटन स्पर्धा
म. टा. क्रीडा प्रतिनिधी, नागपूर
नागपूर जिल्हा संघटनेच्या वतीने सुरू असलेल्या सबज्युनिअर व मास्टर्स बॅडमिंटन स्पर्धेत १५ वर्षांखालील मुलींच्या एकेरीत अव्वल मानांकित निकिता जोसेफ, द्वितीय मानांकित पिनाक रोकडे, तिसरी मानांकित क्रिपी सजवान, चौथी मानांकित आसावरी खांडेकर यांनी उपांत्य फेरीत मजल मारली.
राष्ट्रसंत तुकडोजी महाराज नागपूर विद्यापीठाच्या सुभेदार हॉलमध्ये सुरू असलेल्या स्पर्धेत १५ वर्षांखालील मुलींच्या उपांत्यपूर्व लढतीत अव्वल मानांकित निकिता जोसेफने दोन गेममध्ये प्रतिस्पर्धी नेहल गोसावीचा २१-१२, २१-९ असा पराभव करत उपांत्य फेरीत प्रवेश केला, तर दुसऱ्या उपांत्यपूर्व लढतीत क्रिपी सजवानला बिगर मानांकित कृतज्ञा देवगडेने चांगलेच झुंजवले. मात्र, क्रिपीने तीन गेममध्ये कृतज्ञाला २१-१३, १४-२१ आणि २१-८ असे पराभूत करत उपांत्य फेरीत प्रवेश केला. चौथी मानांकित आसावरी खांडेकरने दोन गेममध्ये संपदा राऊतला २१-११, २१-७ असे पराभूत करत उपांत्य फेरी गाठली, तर पिनाक रोकडेनेही प्रतिस्पर्धी सृष्टी काणेचा २२-२०, २१-१३ असा पराभव करत उपांत्य फेरीत प्रवेश केला.
मास्टर्स गटात उपांत्य फेरीत गुरदीप सिंग अरोरा आणि मनीष भट्टी या जोडीने पुरुषांच्या ४५ वर्षांहून अधिक वयोगटात अंतिम फेरीत प्रवेश केला. अरोरा- भट्टी जोडीने उपांत्य लढतीत आनंद कासरेकर व भावेश देशमुख जोडीचा २५-२३, २१-१० असा पराभव करत अंतिम फेरी गाठली. तर ५५ वर्षांहून अधिक वयोगटात पुरुष एकेरीत शरद महाजन यांनी उपांत्य लढतीत किसनलाल सोनी यांचा २१-११, २१-३ असा पराभव केला. तर आलोक कनोदिया यांनी सतपाल सिंगचा २१-८, २१-१९ असा पराभव करत अंतिम फेरीत प्रवेश केला.