कश्यप उपांत्य फेरीत पराभूत

इंचॉन : भारताच्या परुपल्ली कश्यपचे कोरिया ओपन बॅडमिंटन स्पर्धेतील आव्हान उपांत्य फेरीत संपुष्टात आले. जागतिक क्रमवारीत अव्वल स्थानी असलेल्या केंतो मोमोताचे आव्हान परतवून लावणे कश्यपला शक्य झाले नाही.

पुरुष एकेरीच्या उपांत्य फेरीत जपानच्या मोमाताने कश्यपवर २१-१३, २१-१५ अशी मात केली. ही लढत ४० मिनिटे चालली. कश्यप जागतिक क्रमवारीत ३०व्या स्थानावर आहे. मोमाताने मागील दोन्ही लढतींत कश्यपला नमविले होते. २०१५नंतर हे दोन्ही प्रथमच आमनेसामने येत होते. मात्र, दोन वेळा जागतिक विजेता राहिलेल्या मोमाताच्या आक्रमक खेळासमोर कश्यपचा निभाव लागला नाही. ३३ वर्षीय हैदराबादच्या कश्यपने या वर्षीच्या कॅनडा ओपनच्या अंतिम फेरीत प्रवेश केला होता. मात्र, मोसमातील दुसऱ्या स्पर्धेत त्याला अंतिम फेरी गाठण्यात यश आले नाही. पहिली गेम एकतर्फीच झाली. दुसऱ्या गेममध्ये कश्यपने मोमोताला १२-१२ असे बरोबरीत गाठले होते. मात्र, यानंतर मोमोताने त्याला संधी दिली नाही.