हैदराबाद : भारताचे दोन स्टार बॅडमिंटनपटू साईना नेहवाल आणि पारुपल्ली कश्यप डिसेंबरमध्ये विवाह करणार असल्याचे सूत्रांनी सांगितले.
गेल्या दशकापासून दोघांचे प्रेमसंबंध होते. २००५मध्ये त्यांनी पी. गोपीचंद यांच्या अॅकॅडमीत एकत्र सरावाला सुरुवात केली. तेथेच त्यांची चांगली मैत्री झाली. त्याचे रुपांतर प्रेमात झाले. दोघांनीही बॅडमिंटनमध्ये चांगली उंची गाठली. अर्थात, साईना दोन पावले पुढे राहिली. अखेर दोघांनी विवाह करण्याचा निर्णय घेतला आहे. सूत्रांनी दिलेल्या माहितीनुसार हा शाहीसोहळा १६ डिसेंबरला पार पडणार असून, या विवाहसोहळ्यात केवळ १०० खास निमंत्रितांनाच आमंत्रित करण्यात येणार आहे. त्यानंतर २१ डिसेंबरला मोठा स्वागत समारंभ आयोजिला आहे. गेल्या काही दिवसांपासून दोन्ही कुटुंबांमध्ये लग्नाबद्दलची चर्चा सुरू होती. अखेर तारीख निश्चित करण्यात आली. इंडोनेशियाच्या सुसी सुसांती-अॅलन, चीनच्या लीन डॅन-शिंगफँग, ब्रिटनच्या ख्रिस-गॅबी, मधुमिता गोस्वामी-विक्रमसिंह, सईद मोदी-अमीता कुलकर्णी हे बॅडमिंटनमधील 'सुपर-कपल' मानले जातात. त्यांच्यात आता साईना (२८ वर्षे)-कश्यप (३२ वर्षे) यांची भर पडली आहे. त्याचबरोबर दीपिका पल्लीकल-दिनेश कार्तिक, इशांत शर्मा-प्रतिमासिंग, गीता फोगट-पवनकुमार, साक्षी मलिक-सत्यवर्त या क्रीडाक्षेत्रातील काही प्रसिद्ध जोड्या आहेत.