जागतिक रँकिंगमधील १६ क्रमांकाच्या जोडीवर विजय
हाँगकाँग बॅडमिंटन
वृत्तसंस्था, कोवलून
बॅडमिंटनच्या मिश्र दुहेरीतील अश्विनी पोनप्पा आणि सात्विकसाईराज रांकीरेड्डी या भारताच्या जोडीने हाँगकाँग ओपन बॅडमिंटन स्पर्धेच्या सलामीलाच सनसनाटी विजयाची नोंद केली. त्यांनी ५४ मिनिटे झुंज देत मिश्रच्या जागतिक बॅडमिंटनमध्ये १६व्या क्रमांकावर असलेल्या वांग ची लिन, ली चिया सिन या तैपईच्या जोडीवर २१-१६, १९-२१, २१-१४ अशी मात करत खऱ्या अर्थाने चमकदार सलामी दिली.
अश्विनी व सात्विक ही मिश्र दुहेरीतील जोडी म्हणजे अनुभव आणि जोश यांचा सुरेख मेळ. त्यांनी पहिल्या गेममध्ये वांग आणि ली यांना फारशी संधी दिली नाही. अश्विनी-सात्विक यांनी सुरुवातीपासूनच प्रतिस्पर्ध्यांवर आघाडी घेतली. ही आघाडी कायम राखून त्यांनी पहिला गेम २१-१६ असा जिंकला. दुसरा गेम मात्र चुरशीचा झाला. उभय जोड्या जबरदस्त बॅडमिंटन खेळत असल्याने दोन्ही जोड्यांपैकी एकालाही सलग तीन गुणांपेक्षा जास्त गुण जिंकता आले नाहीत. तैवानच्या वांग आणि ली यांनी हा चुरशीचा गेम २१-१९ असा जिंकून सामना निर्णायक गेममध्ये खेचला.
निर्णायक गेमही अटीतटीचा झाला. अगदी ९-९ पर्यंत बरोबरी होती; पण अश्विनी-सात्विकने खेळातील वेग वाढवत आक्रमण आणखी धारधार केले. ज्यामुळे भारताला आघाडी मिळाली. अन् त्यांनी हा निर्णायक गेम २१-१४ असा जिंकून लढत जिंकली. सात्विक-अश्विनीची पुढील फेरीतही लढत होईल ती तैवानच्याच ली यांग-सू या चिंग यांच्याशी. यांग व चिंग ही जोडी जागतिक रँकिंगमध्ये ३१व्या क्रमांकावर आहे.
-कश्यप मुख्य फेरीत
भारताच्या परुपल्ली कश्यपने हाँगकाँग स्पर्धेच्या मुख्य फेरीत प्रवेश केला. त्याला पहिल्या फेरीत पुढे चाल मिळाली होती. कारण त्या फेरीतील त्याचा मलेशियन प्रतिस्पर्धी इस्कंदर जुलकरनैन यांने माघार घेतली. प्राथमिक फेरीच्या दुसऱ्या सामन्यात कश्यपने तैपईच्या अव्वल सीडेड सू जेन हाओ याला तीन गेममध्ये २१-७, १२-२१, २१-१८ असे नमवले. दुखापतींच्या ससेमिऱ्यात अडकल्याने कश्यप सध्या जागतिक रँकिंगमध्ये ५२व्या क्रमांकावर आहे. या स्पर्धेत सिंधू, सायना नेहवाल, श्रीकांत, प्रणॉय, समीर वर्मा, साईप्रणीत, मनू अत्री-सुमीत रेड्डी, चिराग शेट्टी (दुहेरी) हे बॅडमिंटनपटूही सहभागी झाले आहेत.