IPL लिलाव: बेन स्टोक्सला १४.५० कोटींचा भाव

मटा ऑनलाइन वृत्त । बेंगळुरू

इंडियन प्रीमिअर लीग (आयपीएल)च्या दहाव्या मोसमासाठी क्रिकेटपटूंचा लिलावाला सुरुवात झाली असून या लिलावात आतापर्यंत इंग्लंडचा अष्टपैलू खेळाडू बेन स्टोक्स हा सर्वाधिक महागडा खेळाडू ठरला आहे. तब्बल १४ कोटी ५० लाख रुपये मोजून रायझिंग पुणे सुपरजायंट्स संघानं त्याला आपल्या तंबूत खेचलं आहे. त्याला कोणता खेळाडू धोबीपछाड देतो, ते पाहणं उत्सुकतेचं ठरणार आहे.

बेंगळुरू येथे आयपीएलच्या दहाव्या मोसमासाठी खेळाडूंचा लिलाव सुरू आहे. अनेक खेळाडूंची खरेदी आतापर्यंत झाली असून अजूनही बोली लावणं सुरूच आहे. बेन स्टोक्ससाठी २ कोटी रुपये बेस प्राइस होती. स्टोक्सला खरेदी करण्यासाठी मुंबई इंडियन्स आणि रॉयल चॅलेंजर्स बेंगळुरूमध्ये जोरदार चुरस होती. २ कोटींवरून ४, ६, ८ आणि १० असा आकडा वाढतच गेला. त्यावर ही बोली थांबेल असं वाटत होतं. मात्र, आकडा वाढतच गेला. अखेर पुणे संघाचे मालक संजीव गोयंका यांनी अचानक एन्ट्री करत मुकेश अंबानींनाही धक्का दिला. गोयंका यांनी स्टोक्सवर थेट १४.५० कोटींची बोली लावत बाजी मारली. स्टोक्सपाठोपाठ इंग्लंडच्याच टायमल मिल्स याला १२ कोटींचा भाव मिळाला. तर, दक्षिण अफ्रिकेचा वेगवाग गोलंदाज कागिसो रबाडा आणि न्यूझीलंडचा वेगवान गोलंदाज ट्रेंट बोल्ट यांना ५ कोटींचा भाव मिळाला.

बेन स्टोक्सनं आतापर्यंत ७७ टी-२० सामने खेळले असून २२.७१च्या सरासरीनं १,२७२ धावा केल्या आहेत. त्यात पाच अर्धशतकांचा समावेश आहे. तर, ८.६०च्या सरासरीनं ३२ गडी बाद केले आहेत.

आतापर्यंत कोणाला किती भाव?

कागिसो रबाडा - ५ कोटी (दिल्ली डेअरडेविल्स)
ट्रेंट बोल्ट - ५ कोटी (कोलकाता नाइट राइडर्स)
पॅट कमिन्स - ४.५ कोटी (दिल्ली डेअरडेविल्स)
ख्रिस वोक्स - ४.२ कोटी (कोलकाता नाइट रायडर्स)
रशिद खान - ४ कोटी (सनरायजर्स हैदराबाद)
कर्ण शर्मा - ३.२ कोटी (मुंबई इंडियन्स)
टी. नटराजन - ३ कोटी (किंग्ज इलेव्हन पंजाब)
वरुण एरॉन - २.८ कोटी (किंग्ज इलेव्हन पंजाब)
अँजलो मॅथ्यूस - २ कोटी (दिल्ली डेअरडेविल्स)
मिचेल जॉन्सन - २ कोटी (मुंबई इंडियन्स)
अनिकेत चौधरी - २ कोटी (रॉयल चॅलेंजर्स बेंगळुरू)
एम. अश्विन - १ कोटी (दिल्ली डेअरडेविल्स)
कोरे अँडरसन - १ कोटी (दिल्ली डेअरडेविल्स)
पवन नेगी - १ कोटी (रॉयल चॅलेजर्स बेंगळुरू)