आयसीसीने नियम केले आणखी कठोर
वृत्तसंस्था, दुबई
चेंडूशी छेडछाड करण्याचा प्रयत्न यापुढे क्रिकेटपटूंना आणखी महागात पडणार आहे. आंतरराष्ट्रीय क्रिकेट परिषदेने आता या चुकीसाठी सहा कसोटी किंवा १२ वनडे बंदीचा निर्णय घेतला आहे. त्याव्यतिरिक्त खेळाडूंनी मैदानावर चांगली वागणूक दाखवावी म्हणून विचित्र हावभाव आणि एखाद्या खेळाडूची निंदानालस्ती केल्यास त्यालाही शिक्षा करण्याचे ठरविले आहे.
डब्लिन येथे झालेल्या वार्षिक परिषदेत आयसीसीने या मुद्द्यांवर विचार केला आणि सभ्य गृहस्थांच्या या खेळातील गैरप्रकारांना हद्दपार करण्यासाठी आणखी एक पाऊल उचलण्याचे ठरविले.
त्यानुसार आता चेंडू कुरतडणे किंवा त्याच्या आकाराशी छेडछाड करणे हा आता दुसऱ्या स्तराचा नव्हे तर तिसऱ्या स्तराचा गुन्हा ठरणार आहे. या वर्षाच्या प्रारंभी, ऑस्ट्रेलियन क्रिकेट या प्रकाराने ढवळून निघाले होते. ऑस्ट्रेलियाचा क्रिकेटपटू स्टीव्ह स्मिथ, डेव्हिड वॉर्नर आणि कॅमेरून बँक्रॉफ्ट यांच्यावर कठोर कारवाई झाली होती.
आयसीसीचे कार्याध्यक्ष शशांक मनोहर यासंदर्भात म्हणाले की, क्रिकेटमध्ये खेळाडूंच्या वागणुकीवर अंकुश असावा असे माझे आणि बोर्डातील सर्व सदस्यांचे एकमत होते. क्रिकेटमध्ये अशा गोष्टींना थारा नाही, हेच दर्शविण्याचा आमचा प्रयत्न आहे.
याआधीच्या नियमावलीनुसार मार्चमध्ये झालेल्या घटनेनंतर स्टीव्ह स्मिथवर एका कसोटीची बंदी घालण्यात आली होती. त्यानंतर गेल्याच महिन्यात श्रीलंकेच्या चंडीमलवर याच आरोपाखाली एका कसोटीची बंदी घालण्यात आली. स्मिथसह वॉर्नरवर नंतर ऑस्ट्रेलियन बोर्डाने एका वर्षाची बंदी घातली. बँक्रॉफ्टवर नऊ महिन्यांची बंदी घालण्यात आली होती.
याव्यतिरिक्त वैयक्तिक निंदा केल्यास दुसऱ्या किंवा तिसऱ्या स्तराचा गुन्हा म्हणून त्याची नोंद होईल तर विचित्र हावभावांना तसेच पंचांच्या निर्णयाला अमान्य केल्यास पहिल्या क्रमांकाचा गुन्हा मानले जाईल. त्याशिवाय, खेळाडू व सपोर्ट स्टाफला याविरोधात दाद मागायची असेल तर त्यासाठी आगाऊ शुल्क भरावे लागेल. त्यात खेळाडूच्या बाजूने निकाल लागला तर ते शुल्क परत केले जाईल.