आमीरच्या निवृत्तीने पीसीबीने घेतला धडा

कराची : पाकिस्तानचा वेगवान गोलंदाज महंमद आमीर याने मर्यादित षटकांच्या क्रिकेटवर लक्ष केंद्रित करण्यासाठी कसोटी क्रिकेटमधून तडकाफडकी निवृत्ती जाहीर केली. यातून योग्य तो धडा पाकिस्तान क्रिकेट बोर्डाने (पीसीबी) घेतला आहे. पीसीबीने यापुढे राष्ट्रीय खेळाडूंना देशांतर्गत क्रिकेटमध्ये खेळणे बंधनकारक केले आहे.

आमीरची पत्नी नरजिस हिच्याकडे ब्रिटनचा पासपोर्ट आहे. त्यामुळे आमीरही तिकडेच स्थायिक होण्याची शक्यता आहे. आता तो पाकिस्तानकडून केवळ टी-२० आणि वन-डे सामने खेळणार आहे. यामुळे पीसीबी सावध झाली असून, त्यांनी पाकिस्तानच्या राष्ट्रीय संघात स्थान मिळवण्यासाठी देशांतर्गत क्रिकेट खेळणे बंधनकारक केले आहे. पाकिस्तानचा एक अधिकारी म्हणाला, 'महंमद आमीर हा कसोटीतून निवृत्त झाला आहे. मात्र, मर्यादित षटकांच्या क्रिकेटसाठी त्याला निवड समितीसमोर आपला पर्याय थेट ठेवता येणार नाही. त्यासाठी त्याने देशांतर्गत होणाऱ्या वन-डे आणि टी-२० सामन्यांत खेळलेच पाहिजे. हा नियम अशा सर्व खेळाडूंना लागू असेल.' कसोटीसाठीही हाच नियम असेल. पाकिस्तानचे पंतप्रधान इम्रान खान यांनीही पीसीबीमध्ये लक्ष घातले आहे. त्यांनी देशांतर्गत क्रिकेटचा ढाचाच बदलला आहे. यात सहा प्रांतिक संघ असतील आणि १६ प्रादेशिक संघ असतील. या सर्वांची दोन विभागात विभागणी होईल. अर्थात, हा ढाचा अद्याप मंजुर करण्यात आलेला नाही.