डब्लिन : न्यूझीलंडच्या १७ वर्षीय अमेलिया केर हिने महिलांच्या वन-डे क्रिकेट सामन्यात सर्वोच्च खेळीचा विक्रम रचला. तिने आयर्लंडविरुद्धच्या वन-डे लढतीत १४५ चेंडूंत ३१ चौकार व २ षटकारांच्या मदतीने नाबाद २३२ धावांची खेळी केली. याचबरोबर अमेलियाने ऑस्ट्रेलियाच्या बेलिंडा क्लार्कचा २१ वर्षांपूर्वीचा विक्रम मोडला. बेलिंडाने डिसेंबर १९९७मध्ये मुंबईत डेन्मार्कविरुद्ध नाबाद २२९ धावांची खेळी केली होती. तिच्या या विश्वविक्रमी खेळीच्या जोरावर न्यूझीलंडने ३ बाद ४४० धावांपर्यंत मजल मारली. अमेलियाने २०१६मध्ये पाकिस्तानविरुद्ध पदार्पण केले आहे. आतापर्यंत तिने १९ वन-डे सामने खेळले असून, तिची यापूर्वीची सर्वोच्च खेळी नाबाद ८१ धावांची होती. तिने ३१ वन-डे विकेटही घेतल्या आहेत. यानंतर लक्ष्याचा पाठलाग करताना आयर्लंडचा डाव ४४ षटकांत १३५ धावांत गारद झाला आणि न्यूझीलंडने ही लढत ३०५ धावांनी जिंकली. याचबरोबर तीन सामन्यांच्या मालिकेत ३-० अशी विजयी आघाडी घेतली. केरने फलंदाजीपाठोपाठ गोलंदाजीतही चमक दाखवली. तिने आयर्लंडचा निम्मा संघ गारद केला.
संक्षिप्त धावफलक : न्यूझीलंड - ५० षटकांत ३ बाद ४४० (अमेलिया केर नाबाद २३२, कास्पेरेक ११३, सॅटर्थवेट ६१, मार्टिझ १-८४, लेविस १-८१) वि. वि. आयर्लंड - ४४ षटकांत सर्वबाद १३५ (रायमंड-होय ४२, कवानाघ २९, केर ५-१७).
संक्षिप्त धावफलक : न्यूझीलंड - ५० षटकांत ३ बाद ४४० (अमेलिया केर नाबाद २३२, कास्पेरेक ११३, सॅटर्थवेट ६१, मार्टिझ १-८४, लेविस १-८१) वि. वि. आयर्लंड - ४४ षटकांत सर्वबाद १३५ (रायमंड-होय ४२, कवानाघ २९, केर ५-१७).