अनुराग ठाकूर BCCIचे नवे अध्यक्ष

मटा ऑनलाइन वृत्त । मुंबई

जगातील सगळ्यात श्रीमंत क्रिकेट संघटना असलेल्या भारतीय क्रिकेट नियामक मंडळाच्या अध्यक्षपदी आज अपेक्षेप्रमाणे अनुराग ठाकूर यांची बिनविरोध निवड झाली आहे. ते बीसीसीआयचे आत्तापर्यंतचे सगळ्यात तरुण अध्यक्ष ठरले आहेत. बोर्डाच्या विशेष सर्वसाधारण सभेत ठाकूर यांचा 'राज्याभिषेक' झाला.

आयसीसीचे स्वतंत्र कार्याध्यक्ष होण्यासाठी शशांक मनोहर यांनी बीसीसीआयच्या अध्यक्षपदाचा राजीनामा दिला होता. त्यानंतर या जागेसाठी काही नावं चर्चेत होती; पण प्रबळ दावेदार म्हणून मंडळाचे सचिव अनुराग ठाकूर यांच्याकडेच पाहिलं जात होतं. पूर्व विभागातील सहाही संघटनांनी त्यांना पाठिंबा जाहीर केल्यानं त्यांची निवड निश्चितच झाली होती. क्रिकेट असोसिएशन ऑफ बंगाल, आसाम, त्रिपुरा, नॅशनल क्रिकेट क्लब, झारखंड क्रिकेट असोसिएशन आदींनी अनुराग ठाकूर यांच्या नामनिर्देशनावर स्वाक्षऱ्या केल्या होत्या. या एकजुटीमुळे बीसीसीआयची सूत्रं 'यंग ब्रिगेड'कडे गेली आहेत.

४१ वर्षीय अनुराग ठाकूर हे भाजपचे खासदार असून हिमाचल प्रदेश क्रिकेट असोसिएशनचे अध्यक्ष आहेत. फिक्सिंगमुळे काही प्रमाणात बदनाम झालेल्या भारतीय क्रिकेटला पुन्हा 'अच्छे दिन' दाखवण्याचं आव्हान ठाकूर यांच्यापुढे आहे. न्यायमूर्ती आर एम लोढा यांच्या समितीनं क्रिकेटच्या शुद्धीकरणासाठी सुचवलेल्या शिफारशी ते स्वीकारणार का आणि त्याची अंमलबजावणी कशी करणार, याबद्दल क्रिकेटवर्तुळात उत्सुकता आहे.

दरम्यान, बीसीसीआयच्या सचिवपदाची जबाबदारी महाराष्ट्र क्रिकेट असोसिएशनचे अध्यक्ष अजय शिर्के यांच्याकडे सोपवण्यात आली आहे.