आशिया कप आता दुबईत

बीसीसीआयने अधिकार केले सुपूर्द

वृत्तसंस्था, दुबई

आशिया कप क्रिकेट स्पर्धा कुठे होणार यावरून सुरू असलेली चर्चा अखेर समाप्त झाली. भारतीय क्रिकेट बोर्डाने एमिरेटस क्रिकेट बोर्डाला या स्पर्धेच्या आयोजनाचे अधिकार सुपूर्द केले. ही स्पर्धा खरे तर भारतात होणार होती. पण पाकिस्तानचा सहभाग या स्पर्धेत असल्यामुळे या संघाला भारतात खेळवताना अडचणींचा सामना करावा लागू शकेल, हे लक्षात घेऊन स्पर्धा हलविण्याच्या हालचाली सुरू झाल्या. आता ती दुबई, अबुधाबीत होणार आहे.

शुक्रवारी बीसीसीआय आणि एमिरेटस क्रिकेट बोर्ड यांच्यात त्यासंदर्भातील करार झाला. त्यानुसार यावर्षीची आशिया कप क्रिकेट स्पर्धा अमिरातीत होणार आहे. भारताकडून हंगामी सचिव अमिताभ चौधरी, मुख्य कार्यकारी अधिकारी राहुल जोहरी व एमिरेटस क्रिकेटचे अध्यक्ष राजे नहयान बिन मुबारक अल नहयान यांच्या उपस्थितीत हा करार झाला.

या स्पर्धेत भारतासह अफगाणिस्तान, बांगलादेश, पाकिस्तान, श्रीलंका आदि देशांचा समावेश आहे. १५ ते २८ सप्टेंबर या कालावधीत दुबई, अबुधाबीत ही स्पर्धा होणार आहे.

यावर्षाच्या प्रारंभी, आशियाई क्रिकेट परिषदेने ही स्पर्धा संयुक्त अरब अमिरातीत होईल, पण त्याचे यजमान भारत असेल अशी घोषणा केली होती.