ऑस्ट्रेलियाची अपूर्ण तयारी

मोहिंदर अमरनाथ

भारत दौऱ्यावर आलेला ऑस्ट्रेलियाचा संघ हा आतापर्यंतच्या संघांपैकी अपूर्ण तयारी करून आलेला संघ वाटतो. तंत्राच्या बाबतीतही या संघाकडून अपेक्षाभंगच पाहायला मिळतो. पहिल्या दोन वनडेत भारताकडून चुका झाल्या नसल्या तरी ऑस्ट्रेलियन फलंदाजांकडून मात्र अपेक्षित कामगिरी झालेली नाही.

बांगलादेशविरुद्ध खेळून आल्यानंतर खरे तर त्यांच्याकडून अधिक तीव्र प्रतिकाराची अपेक्षा होती पण कुलदीप यादव आणि यजुर्वेंद्र चहल यांच्या फिरकीपुढे त्यांनी सपशेल लोटांगण घातले आहे. त्यांचे पदलालित्य कमकुवत आहे तर काही फलंदाज निष्कारण आक्रमण करीत आहेत. वॉर्नरसारखा अनुभवी फलंदाजही भरकटला आहे. स्टीव्ह स्मिथ वगळता अन्य फलंदाजांकडून १०० टक्के प्रयत्न होताना दिसत नाहीत.

कुलदीपच्या कामगिरीमुळे मी प्रभावित झालो आहे. इंदूरमध्ये रविवारी पाऊस असेल असा अंदाज आहे. पण पूर्ण सामना झाला तर भारताला रोखणे पाहुण्यांना कठीणच जाणार आहे.