सराव सामन्यांबाबत ऑस्ट्रेलिया सकारात्मक

वृत्तसंस्था, मेलबर्न

या वर्षअखेरीस ऑस्ट्रेलिया दौऱ्यावर जाणाऱ्या भारतीय संघाला अधिक सराव सामने खेळण्याची संधी मिळायला हवी, या भारतीय संघप्रशिक्षक रवी शास्त्री यांच्या आवाहनला क्रिकेट ऑस्ट्रेलियाने सकारात्मक प्रतिसाद दिला आहे.

इंग्लंड दौऱ्यावर भारताला केवळ एक सराव सामना खेळता आला होता. या मालिकेत भारताला १-४ असा पराभव पत्करावा लागला आणि सराव सामन्यांच्या आयोजनाचा मुद्दा ऐरणीवर आला. त्यावर शास्त्री यांनी म्हंटले होते, की ६ डिसेंबरपासून अॅडलेड येथे ऑस्ट्रेलियाविरुद्ध जी पहिली कसोटी रंगणार आहे, त्याआधी अधिक सराव सामन्यांचे आयोजन केले गेले पाहिजे. यावर क्रिकेट ऑस्ट्रेलियाने म्हटले आहे, की आम्ही या संदर्भात भारतीय क्रिकेट बोर्डाशी चर्चा करण्यास तयार आहोत; पण आम्हाला अशा सराव सामन्यांची संख्या वाढविण्यासंदर्भात कोणतेही अधिकृत पत्र बीसीसीआयकडून मिळालेले नाही.

इंग्लंडमध्ये एसेक्सविरुद्ध चार दिवसांचा एकमेव सराव सामना आयोजित करण्यात आला होता; पण त्या सामन्याच्या खेळपट्टी आणि मैदान यावर भारतीय संघाने नाराजी प्रकट केली होती. शेवटी हा सामना तीन दिवसांचा खेळविला गेला. अॅडलेडच्या कसोटीआधी, भारत आणि ऑस्ट्रेलिया यांच्यात तीन टी-२० लढती होणार आहेत; पण शास्त्री यांनी कसोटी मालिकेआधी काही सराव सामन्यांचे आयोजन करण्याची विनंती केली आहे. भारत या दौऱ्यात तीन टी-२० सामने, चार कसोटी सामने आणि तीन वनडे सामने खेळणार आहे. २१ नोव्हेंबर ते १८ जानेवारी असा हा मोठा दौरा असेल. २०१४-१५मध्ये ऑस्ट्रेलिया दौऱ्यात भारतीय संघाला चार कसोटी सामन्यांची मालिका २-० अशी गमवावी लागली होती.