दक्षिण आफ्रिकेची सामन्यावर पकड

पोर्ट एलिझाबेथ : दक्षिण आफ्रिकेने ऑस्ट्रेलियाविरुद्धच्या मालिकेतील दुसऱ्या कसोटी क्रिकेट सामन्यावर रविवारी पकड मिळवली आहे. पहिल्या डावात १३९ धावांची आघाडी घेतल्यानंतर आफ्रिकेने तिसऱ्या दिवशी ऑस्ट्रेलियाची अवस्था दुसऱ्या डावामध्ये ५ बाद १८० अशी केली. ऑस्ट्रेलियाकडे आता केवळ ४१ धावांची आघाडी आहे.

एबी डिव्हिलियर्स झळकावलेल्या शतकामुळे आफ्रिकेला पहिल्या डावात ३८२ धावांपर्यंत मजल मारून १३९ धावांची आघाडी घेता आली. डिव्हिलियर्सने कसोटी कारकिर्दीतील बाविसावे शतक झळकावताना १४६ चेंडूंमध्ये २० चौकार व एका षटकारासह नाबाद १२६ धावांची खेळी केली. त्याने तळातील फिलँडर आणि केशव महाराज यांच्यासह अनुक्रमे ८४ आणि ५८ धावांची भागीदारी रचली. ऑस्ट्रेलियाकडून पॅट कमिन्सने ३ विकेट घेतल्या. दुसऱ्या डावात ऑस्ट्रेलियाला चांगली सुरुवात करता आली नाही. वॉर्नर, स्मिथसह आघाडीचे फलंदाज झटपट बाद झाल्याने ऑस्ट्रेलियाची अवस्था चहापानानंतर ४ बाद ८६ अशी झाली होती. उस्मान ख्वाजा आणि मिचेल मार्श यांनी पाचव्या विकेटसाठी ८७ धावांची भागीदारी रचून संघाचा डावाने पराभव टाळला. राबाडाने ख्वाजाला बाद करून ही जोडी फोडली. ख्वाजाने १३६ चेंडूंमध्ये १४ चौकारांसह ७५ धावा केल्या. त्यानंतर मार्शने टीम पेनसह दिवसअखेरपर्यंत किल्ला लढवला. खेळ थांबला, तेव्हा मार्श ३९, तर पेन ५ धावांवर खेळत होते.

संक्षिप्त धावफलक : ऑस्ट्रेलिया - पहिला डाव - सर्वबाद २४३ आणि दुसरा डाव - ६३ षटकांत ५ बाद १८० (उस्मान ख्वाजा ७५, मिचेल मार्श खेळत आहे ३९, कॅमेरॉन बँक्रॉफ्ट २४, कॅगिसो राबाडा ३-३८, लुंगी एन्डिगी १-२१) विरुद्ध दक्षिण आफ्रिका - पहिला डाव ११८.४ षटकांत सर्वबाद ३८२ (एबी डिव्हिलियर्स नाबाद १२६, हशिम अमला ५६, डीन एल्गर ५७, पॅट कमिन्स ३-७९, मिचेल मार्श २-२६).