विराटला डिवचू नका; डु प्लेसिसचा AUSला सल्ला

मेलबर्न:

महाराष्ट्र टाइम्स.कॉम

भारत आणि ऑस्ट्रेलिया हे क्रिकेटविश्वातील दोन दिग्गज संघ २१ नोव्हेंबरपासून भिडणार आहेत. त्या पार्श्वभूमीवर दक्षिण आफ्रिकेचा कर्णधार फाफ डु प्लेसिसनं ऑस्ट्रेलिया संघाला काही 'टिप्स' दिल्या आहेत. 'रनमशीन' विराट कोहलीशी थेट भिडू नका, त्याला डिवचू नका, असा सल्ला त्यानं ऑस्ट्रेलियाच्या फलंदाजांना दिला आहे.

या वर्षाच्या सुरुवातीला झालेल्या मालिकेत आम्ही शांतपणे विराट कोहलीचा सामना केला. आंतरराष्ट्रीय सामन्यांमध्ये काही खेळाडूंना प्रतिस्पर्ध्यांशी भिडायला आवडतं. विराट कोहली हा त्यातीलच एक खेळाडू आहे. अशात आम्ही शांतपणे विराटला सामोरे गेलो. त्या मालिकेत दक्षिण आफ्रिकेनं भारताला २-१च्या फरकानं नमवलं होतं. कोहलीनं तीन कसोटी सामन्यांत ४७.६६च्या सरासरीनं २८६ धावा केल्या होत्या, असं उदाहरणही डु प्लेसिसनं दिलं.

प्रत्येक संघात अशा प्रकारचे एक-दोन खेळाडू आहेत. त्यांचा सामना करण्याआधी आम्ही त्यांच्याबद्दल चर्चा करून शांत राहण्याची रणनिती आम्ही आखतो. कोहली जबरदस्त खेळाडू आहे. आम्ही त्याच्यासमोर शांत राहिलो. त्यानं निश्चितच धावा केल्या, पण खूप जास्त नाहीत, असंही डु प्लेसिस म्हणाला. दरम्यान, भारतीय संघ ऑस्ट्रेलियाविरुद्ध तीन टी-ट्वेंटी, चार कसोटी सामने आणि तीन एकदिवसीय सामने खेळणार आहे. पहिला टी-ट्वेंटी सामना २१ नोव्हेंबरला होणार आहे.