हेरमच्या शतकानंतरही बालमोहन पराभूत

मुंबई : मुंबई शालेय क्रीडा संघटना आयोजित १६ वर्षांखालील मुलांच्या हॅरिस शिल्ड क्रिकेट स्पर्धेत उपांत्यपूर्व फेरीत पराभूत झालेल्या संघांतील उपांत्य फेरीच्या लढतीत हेरम यादवने केलेल्या १०७ धावांनंतरही बालमोहन इंग्लिश शाळेला एचव्हीबी अकादमीविरुद्ध १ विकेटने हार पत्करावी लागली. या प्लेट ग्रुपमधील आठ संघ आता अंतिम फेरीत खेळतील.

दिगंबर पाटकर विद्यालयाच्या श्रीओम सानपने ९६ धावांची खेळी करून संघाला बिलाबाँग शाळेविरुद्ध विजय मिळवून दिला. अथर्व डाकवेने ४ बळी घेत त्यात मोलाची कामगिरी केली. पार्ले टिळक मराठी शाळेला पार्ले टिळक इंग्लिशकडून ९ विकेटसनी हार सहन करावी लागली. इंग्लिश शाळेचा गौरव चव्हाणने या लढतीत ५ बळी घेतले. अंजुमन अलानाने माटुंगा प्रीमियर शाळेवर १२० धावांनी मात केली. रयान इंटरनॅशनलच्या अंकित भारद्वाजने ५ बळी व नाबाद ४९ धावा अशी अष्टपैलू कामगिरी करत सेंट फ्रान्सिस डी असिसी शाळेवर ९ विकेटनी विजय मिळवला. गोकुळधामच्या आर्यन शेट्टीने नाबाद ९० धावा करत सेंट जोसेफ शाळेला नमवले.