भरत अरुण नवा गोलंदाजी प्रशिक्षक

मटा ऑनलाइन वृत्त । मुंबई

भारतीय संघाचा गोलंदाजी प्रशिक्षक म्हणून भरत अरुण याची निवड करण्यात आली आहे. बीसीसीआयच्या मुंबई मुख्यालयात झालेल्या बैठकीत हा निर्णय घेण्यात आला. दरम्यान, फलंदाजीसाठी सहाय्यक प्रशिक्षक म्हणून संजय बांगर, तर क्षेत्ररक्षण प्रशिक्षकपदी आर. श्रीधर यांच्या नावावरही शिक्कामोर्तब करण्यात आले आहे.

भारतीय संघाचा नवा मुख्य प्रशिक्षक रवी शास्त्रीने भरत अरुणच्या नावाची गोलंदाजी प्रशिक्षकपदासाठी शिफारस केली होती. बीसीसीआयच्या आजच्या बैठकीत ही शिफारस स्वीकारून अरुणच्या नावावर शिक्कामोर्तब करण्यात आले. बीसीसीआयचे हंगामी अध्यक्ष सी. के. खन्ना, सचिव अमिताभ चौधरी यांच्यासह शास्त्रीही या बैठकीला उपस्थित होता.

दरम्यान, भरत अरुणने याआधी २०१४ ते २०१६ या दरम्यान रवी शास्त्री भारतीय संघाचा संचालक असताना गोलंदाजी प्रशिक्षक म्हणून काम पाहिलेले आहे.

द्रविड, झहीर उरले नामधारी!

सचिन तेंडुलकर, सौरव गांगुली आणि व्ही. व्ही. एस. लक्ष्मण यांच्या त्रिसदस्यीय सल्लागार समितीसाठी आजचा निर्णय फार मोठा झटका देणारा ठरला आहे. अरुण आणि बांगर यांच्या निवडीमुळे झहीर खान आणि राहुल द्रविड हे दोघेही नामधारी ठरणार आहेत. त्यांच्याबाबत बीसीसीआयने आज नव्याने कोणतीही भूमिका स्पष्ट केलेली नाही. मात्र, गोलंदाजी सल्लागार म्हणून झहीर आणि फलंदाजी सल्लागार म्हणून द्रविडकडून दिल्या जाणाऱ्या सूचनांचं स्वागतच आहे, असे शास्त्री म्हणाला.