काश्मिरींना पाक समर्थक बोलून आफ्रिदी गोत्यात

मटा ऑनलाइन वृत्त । नवी दिल्ली

पाकिस्तान क्रिकेट संघाचा कर्णधार शाहीद आफ्रीदीने पाक संघाला पाठिंबा देण्यासाठी काश्मीरमधून प्रेक्षक आल्याचं विधान केल्याने त्याच्यावर चौफेर टीका होऊ लागली आहे. बीसीसीआयचे सचिव व भाजप खासदार अनुराग ठाकूर यांनी आफ्रिदीची खरमरीत शब्दांत कानउघाडणी केली असून क्रिकेटच्या मैदानावर अशी राजकीय आशयाची विधानं करू नयेत, असा इशारावजा सल्ला ठाकूर यांनी आफ्रिदीला दिला आहे.

मोहाली येथे मंगळवारी पाकिस्तान-न्यूझीलंड यांच्यातील सामना सुरू होण्यापूर्वी आफ्रिदीने कॉमेंटेटर रमीझ राजा याच्याशी बोलताना हे वादग्रस्त विधान केलं. मोहालीत पाक संघाला प्रेक्षकांचा कितपत पाठिंबा मिळणार, अशा आशयाचा प्रश्न रमीझने विचारला असता आमच्या समर्थनासाठी मोठ्या संख्येने प्रेक्षक काश्मीरमधून आले आहेत, असं उत्तर आफ्रिदीने दिलं.

आफ्रिदीच्या या विधानावर अनुराग ठाकूर यांच्याबरोबरच अनेकांनी आक्षेप घेतला आहे. काँग्रेसचे संदीप दीक्षित यांनी आफ्रिदीने हा खोडसाळपणा जाणूनबुजून केल्याचा आरोप केला. पाक सेना आणि तेथील सरकारच्या दबावातून आफ्रिदी हे बोलला असून अशी विधानं क्रिकेटपटूंनी करणं योग्य नाही, असे दीक्षित म्हणाले. विश्व हिंदू परिषदेकडूनही आफ्रिदीच्या विधानाचा विरोध करण्यात आला आहे.

दरम्यान, पाकिस्तानपेक्षा भारतात आम्हाला जास्त प्रेम मिळतं असं विधान करून आफ्रिदीने गोची करून घेतली होती. पाकिस्तानमधून त्याच्यावर टीकेचा भडीमार करण्यात आला होता.