BCCI v/s Lodha:सर्वोच्च न्यायालयाचा निर्णय १७ ला

मटा ऑनलाइन वृत्त । नवी दिल्ली

लोढा समिती आणि बीसीसीआयमधल्या वादावर आता सर्वोच्च न्यायालय १७ ऑक्टोबरला आपला निर्णय देणार आहे. कारण पुढील १० दिवस दसऱ्यानिमित्त सर्वोच्च न्यायालय बंद राहणार आहे.

सर्वोच्च न्यायलयाने नेमलेल्या न्या. लोढा समितीने भारतीय क्रिकेट नियामक मंडळाच्या कारभारात सुधारणा आणण्यासाठी बीसीसीआयच्या उच्चपदस्थांना हटवण्याची मागणी केली होती. यावर आज सर्वोच्च न्यायालयाचा निर्णय अपेक्षित होता. पण तो १७ ऑक्टोबरपर्यंत लांबणीवर पडल्याने आता लोढा समितीच्या शिफारशी लागू करण्यासाठी बीसीसीआयकडे आणखी १० दिवसांचा वेळ आहे.

यासोबतच सर्वोच्च न्यायालयाने १२ राज्य असोसिएशन्सला निधी वितरीत करण्यावर बंदी आणली आहे. जोपर्यंत भारतीय क्रिकेट नियामक मंडळ समितीच्या शिफारशी स्वीकारत नाही, तोपर्यंत त्याला राज्य असोसिएशनला निधी देता येणार नाही.

याव्यतिरिक्त न्यायालयाने बीसीसीआयचे अध्यक्ष अनुराग ठाकूर यांना एक वैयक्तिक प्रतिज्ञापत्र सादर करायला सांगितले आहे. लोढा समितीच्या शिफारशींबाबत आयसीसीचे अध्यक्ष डेविड रिचर्डसन यांना काय सांगितले, ते ठाकूर यांना या प्रतिज्ञापत्रात नमूद करायचे आहे.