ऑफ स्टंप चेंडू खेळताना विराटला होतोय त्रास

मटा ऑनलाइन वृत्त। लंडन

भारतीय क्रिकेट संघाचा कर्णधार विराट कोहली आपला खेळ अधिक चांगला करण्यासाठी सध्या मेहनत घेतोय. इंग्लंडमध्ये सुरू असलेल्या चॅम्पियन्स ट्रॉफी सामन्यांमध्ये ऑफ स्टंपमधून बाहेर जाणारा चेंडू खेळताना विराटला त्रास होत होता. त्यामुळे आता अशा चेंडूंसाठी तो सरावात अधिक मेहनत घेत आहे.

त्यासाठी फिल्डिंग प्रशिक्षक आर. श्रीधर, थ्रोडाऊन तज्ञ राघवेंद्र आणि बॅटिंग प्रशिक्षक संजय बांगड यांनी विराटकडून थ्रोडाऊनवर चांगलाच सराव करून घेतला. नेट सरावात प्रशिक्षक बांगड यांनी विराटला लाल ड्युक चेंडूवर खेळायला लावले तर प्रशिक्षक श्रीधर आणि राघवेंद्र यांनी पांढऱ्या चेंडूनेच त्याचा सराव घेतला. विराट रविवारी होणाऱ्या दक्षिण आफ्रिकेविरोधातील उपांत्य फेरीत सामन्यासाठी ही तयारी करत होता.

खरं तर कोणताही फलंदाज सामन्या आधी एक दिवस लाल चेंडूने कधीच सराव करत नाही. कारण लाल चेंडू हवेमध्ये वेगाने फिरतो. याउलट पांढरा चेंडू हवेत जास्त काळ फिरत नाही. विराटला मात्र सरावासाठी वेगात फिरणारा चेंडूच हवा होता. आता यापुढील सामन्यांमध्ये विराटला या सरावाचा किती फायदा होतो, ते लवकरच कळेल.