विराटशी चर्चेनंतरच ठरणार 'महागुरू'

मटा ऑनलाइन वृत्त । । मुंबई

भारतीय क्रिकेट संघाच्या मुख्य प्रशिक्षकपदाबाबत अद्याप कोणताही अंतिम निर्णय घेण्यात आलेला नाही. या पदासाठी आज रवी शास्त्री आणि वीरेंद्र सेहवाग यांच्यासह पाच जणांच्या मुलाखती झाल्या आहेत. मात्र अंतिम निर्णय कर्णधार विराट कोहलीशी चर्चा करूनच घेतला जाईल, असे बीसीसीआय सल्लागार समिती सदस्य सौरभ गांगुलीने प्रसारमाध्यमांना सांगितले.

टीम इंडियाच्या मुख्य प्रशिक्षकपदासाठी आज बीसीसीआयच्या मुंबई मुख्यालयात मुलाखती झाल्या. तीन सदस्यीय सीएसीने या मुलाखती घेतल्या. त्यातील सौरव गांगुली व व्ही. व्ही. एस. लक्ष्मण हे दोन सदस्य मुख्यालयात हजर होते तर सचिन तेंडुलकरने या प्रक्रियेत ऑनलाइन भाग घेतला. वीरेंद्र सेहवागने सर्वात आधी मुलाखत दिली. सुमारे दोन तास त्याची मुलाखत चालली. त्यानंतर अन्य चौघांच्या मुलाखती झाल्या.

याबाबत नंतर गांगुली आणि लक्ष्मणने पत्रकार परिषद घेऊन माहिती दिली. आज एकूण पाच जणांच्या मुलाखती झाल्या. त्यात रवी शास्त्री, टॉम मूडी, वीरेंद्र सेहवाग, रिचर्ड पायबस आणि लालचंद राजपूत यांचा समावेश होता, असे गांगुली म्हणाला.

प्रशिक्षक निवडीची प्रक्रिया पूर्ण झाली आहे. मात्र विराट कोहलीशी चर्चा केल्यानंतरच आम्ही अंतिम निर्णय घेणार आहोत. त्यासाठी थोडी वाट पाहावी लागणार आहे, असे गांगुली म्हणाला. विराटने प्रशिक्षकाबाबत कोणत्याही प्रकारचा हस्तक्षेप केलेला नाही वा कोणतं मतही माडलेलं नाही, असेही एका प्रश्नाच्या उत्तरात गांगुली म्हणाला.

दरम्यान, प्रशिक्षकपदासाठी एकूण दहा बायोडेटा आले होते. त्यातील ५ जणांची नावे मुलाखतीसाठी निश्चित करण्यात आली होती.