‘सीओए’ने बजावली पदाधिकाऱ्यांना नोटीस

वृत्तसंस्था, नवी दिल्ली
बुधवारी झालेल्या भारतीय क्रिकेट नियामक मंडळाच्या (बीसीसीआय) विशेष सर्वसाधारण सभेमध्ये सीईओ राहुल जोहरी यांना उपस्थित राहू न दिल्याबद्दल प्रशासकीय समितीने (सीओए) बीसीसीआयच्या पदाधिकाऱ्यांना नोटीस बजावली आहे. नोटीस बजावण्यात आलेल्या पदाधिकाऱ्यांमध्ये प्रभारी अध्यक्ष सी. के. खन्ना यांचाही समावेश आहे.
सीओएने ६ एप्रिल रोजी जाहीर केलेल्या स्थिती अहवालामध्ये बीसीसीआयच्या सर्व सभांना जोहरी हे प्रतिनिधी म्हणून उपस्थित राहतील, असे सांगण्यात आले होते. तथापि, गुरुवारी बीसीसीआयचे प्रभारी सचिव अमिताभ चौधरी यांनी जोहरी यांना बैठकीस उपस्थित न राहण्याची विनंती केली.
सुप्रीम कोर्टाने २४ जुलै रोजी आदेशानुसार केवळ बीसीसीआयच्या पदाधिकाऱ्यांनाच विशेष सभेस उपस्थित राहता येणार होते. म्हणून जोहरी यांना सभेस परवानगी नाकारण्यात आल्याचे चौधरी यांनी सांगितले.