राष्ट्रगीतावरून अमिताभ बच्चन पुन्हा अडचणीत

मटा ऑनलाइन वृत्त । नवी दिल्ली

कोलकाता येथे ईडन गार्डन्सवरील भारत-पाक सामन्याआधी ज्येष्ठ अभिनेते अमिताभ बच्चन यांनी गायलेले राष्ट्रगीत पुन्हा एकदा चर्चेत आले आहे. अमिताभ यांनी राष्ट्रगीत म्हणण्यासाठी निश्चित वेळेपेक्षा अधिक वेळ घेतला असा नवा आरोप अमिताभ बच्चन यांच्यावर करण्यात आला आहे.

अमिताभ बच्चन यांच्या विरोधात नवी दिल्लीतील अशोक नगर पोलीस ठाण्यात तक्रार नोंदवण्यात आली आहे. राष्ट्रगीत गाण्यासाठी निश्चित वेळ ५२ सेकंद इतकी आहे. मात्र अमिताभ यांनी राष्ट्रगीत गाण्यासाठी १ मिनिट आणि २० सेकंद इतका वेळ घेतला असे तक्रारदाराने म्हटले आहे. याआधी रविवारी पाकिस्तानी गायक शफकत अमानत अलीवर देखील आपल्या देशाचे राष्ट्रगीत चुकीचे गायल्याचा आरोप करण्यात आला होता. शफकतने याप्रकरणी माफी देखील मागितली होती.

कोलकाता येथे शनिवारी भारत-पाक सामन्याआधी अमिताभ बच्चन यांनी भारतचे तर पाकिस्तानी गायक शफकत अमानत अली यांनी पाकिस्तानचे राष्ट्रगीत गायले होते.

याआधी राष्ट्रगीत गाण्यासाठी अमिताभ यांनी चार कोटी रुपये घेतले, असा आरोप करण्यात आला होता. मात्र भारतीय संघाचा माजी कर्णधार सौरव गांगुली याने हे वृत्त खोटे असल्याचे स्पष्ट केले होते.