गिरकी घेत टाकलेला चेंडू रद्द

वृत्तसंस्था, नवी दिल्ली

उत्तर प्रदेशचा डावखुरा फिरकी गोलंदाज शिवा सिंगने ३६० अंशाच्या कोनात गोल फिरून टाकलेला चेंडू पंचांनी रद्द ठरविला आणि त्या चेंडूच्या व्हीडिओची सर्वत्र चर्चा सुरू झाली. सी. के. नायडू ट्रॉफी क्रिकेट स्पर्धेत बंगालविरुद्धच्या सामन्यात उत्तर प्रदेशच्या या खेळाडूने हा चेंडू टाकला. त्याचा व्हीडिओ सर्वत्र लोकप्रिय झाला आहे.

बंगालच्या दुसऱ्या डावात शिवाने चेंडू टाकण्यापूर्वी ३६० अंशातून गिरकी घेतली आणि नंतर चेंडू फलंदाजाच्या दिशेने सोडला. पंचांनी मात्र तो रद्द ठरविला.

भारताचे माजी कप्तान बिशनसिंग बेदी यांनी ट्विट करून हा चेंडू विचित्र असल्याचे म्हटले. हाच शिवा पृथ्वी सावच्या नेतृत्वाखालील भारताच्या १९ वर्षांखालील संघातला सदस्य होता.

शिवाने गिरकी घेतल्यानंतरच पंच विनोद शेषन यांनी चेंडू रद्द ठरविला. त्यामुळे शिवाने नाराजी व्यक्त केली. त्यानंतर सामना काही काळ थांबला. त्यावेळी पंचांनी हा चेंडू का रद्द ठरविला याचे स्पष्टीकरण शिवाला दिले. एमसीसीच्या नियमानुसार असा चेंडू टाकणे गैर आहे, असे पंचांनी सांगितले.

एमसीसीच्या २०.४.२.७ या नियमानुसार फलंदाजाला गोंधळून टाकण्याचा प्रयत्न गोलंदाजाने केल्यास तो चेंडू मोजला जाणार नाही. मात्र या चेंडूचा व्हीडिओ सर्वत्र पसरू लागल्यानंतर अशीही चर्चा रंगली की, जर फलंदाज चेंडूला कसेही उलटसुलट मारू शकतो तर गोलंदाजाला तशी परवानगी का नाही ?