रोहित, रहाणेच्या बॅटमध्ये ‘चीप’

मुंबई : नुकत्याच ओव्हल येथे बांगलादेशविरुद्धच्या झालेल्या सराव सामन्यात आपण कसे बाद झालो याचा सध्या रोहित शर्मा, अजिंक्य रहाणे अभ्यास करीत आहेत. या चुका टाळण्यासाठी त्यांना मदत होत आहे ती त्यांच्या बॅटमध्ये बसवलेल्या ‘चीप’ची.

चॅम्पियन्स ट्रॉफी स्पर्धेत पाकिस्तानविरुद्ध ४ जून रोजी होणाऱ्या लढतीत रोहित, रहाणेसह रवीचंद्रन अश्विनदेखील ही चीप बसवलेली बॅट वापरणार आहे. यामुळे आपण बाद झालो तेव्हा बॅटचा ‘अँगल’ काय होता, हे त्यांना समजणार आहे. त्याचबरोबर बॅटचा वेग, बॅट कशी फिरली, बॅक लिफ्ट आदी गोष्टींचाही उलगडा होणार आहे. त्यामुळे तुम्ही सरळ बॅटने खेळत होता, की अॅक्रॉस द लाइन हेदेखील कळू शकले. थोडक्यात फलंदाजाने खेळलेल्या प्रत्येक ‘स्ट्रोक’चा हिशेब या चीपमध्ये राखला जाणार आहे. आयसीसीच्या स्पर्धेत अशा प्रकारची बॅट वापरण्याची मुभा त्यांना मिळाली आहे. त्यामुळे लपवाछपवी करून ही चीप बसवलेली नाही. या चीपमध्ये रेकॉर्डिंगची सोय असल्याने फलंदाजांना त्यांच्या कामगिरीचे विश्लेषण करता येणार आहे. या चीपमधील इमेजेस कम्प्युटरमध्ये विशिष्ट एका सॉफ्टवेअरद्वारे घेता येणार आहेत. प्रत्येक संघातील काही खेळाडू ही बॅट वापरू शकणार आहे. त्यात भारताच्या रोहित, रहाणे आणि अश्विनचाही समावेश आहे. क्रिकेटमधील वाढत्या तंत्रज्ञानाचा हा पुरावा आहे. याचा फायदा त्याला फलंदाजांना आणि प्रशिक्षकांना होणार आहे.