कर्णधाराचा एका निर्णयाने ऑस्ट्रेलियाला २३१ कोटींचा फटका, भारताच्या दौऱ्यापूर्वी मोठा धक्का

नवी दिल्ली : ऑस्ट्रेलियाचा संघ काही दिवसांतच भारताच्या दौऱ्यावर येणार आहे. पण या दौऱ्यावर येण्यापूर्वी ऑस्ट्रेलियाला आता तब्बल २३१ कोटी रुपयांचा जोरदार फटका बसला आहे. कर्णधार पॅट कमिन्समुळे यावेळी ऑस्ट्रेलियाला एवढे मोठे नुकसान झाल्याचे समोर आले आहे.

पॅट कमिन्स आणि ऑस्ट्रेलियाच्या क्रिकेट मंडळाने मुख्य कार्यकारी अधिकारी निक हॉकली यांच्यामध्ये एक बैठक झाली होती. या बैठकीत कमिन्सने अलिंटा एनर्जीसोबत राष्ट्रीय संघाच्या कराराबद्दल चिंता व्यक्त केली. ही कंपनी ऑस्ट्रेलियाच्या क्रिकेट मंंडळाची स्पॉन्सर होती. कमिन्सच्या वक्तव्यानंतर अलिंटा एनर्जीने ऑस्ट्रेलियाच्या क्रिकेट मंडळाला आता मोठा धक्का दिला आहे. कारण अलिंटा एनर्जी या कंपनीने आता जून २०२३ नंतर ऑस्ट्रेलियाच्या क्रिकेट मंडळाला स्पॉन्सरशिप देण्यात नकार दिला आहे. त्यामुळे ऑस्ट्रेलियाच्या क्रिकेट मंडळाचे २३१ कोटी रुपयांचे मोठे नुकसान होणार असल्याचे आता समोर येत आहे.

कमिन्सने यावेळी आपली प्रतिक्रीया देताना सांगितले की, " मी ज्या पदावर आहे तो काटेरी मुकूट असतो, असे म्हटले जाते. कारण विविध वादांचा सामना मला कराा लागतो. काही वेळी तर जे तुम्हाला ओळखत नाहीत ते तुमच्याबाबत मतं बनवतात आणि त्यानंतर बऱ्याच समस्या निर्माण होतात."

भारत आणि ऑस्ट्रेलिया यांच्यातील चार सामन्यांची बॉर्डर-गावस्कर कसोटी मालिका पुढील महिन्यात ९ फेब्रुवारीपासून सुरू होत आहे. जागतिक कसोटी चॅम्पियनशिपच्या दृष्टीने ही कसोटी मालिका खूप महत्त्वाची आहे. कारण या मालिकेत भारताने मोठा विजय मिळवला तरच त्यांना जागतिक कसोटी स्पर्धेच्या फायनलमध्ये पोहोचता येणार आहे. श्रीलंका आणि न्यूझीलंडला पराभूत केल्यानंतर भारतीय संघाचा उत्साह वाढलेला आहे. पण दुसरीकडे स्टीव्ह स्मिथसारखा फलंदाज भन्नाट फॉर्ममध्ये परतला आहे आणि ही गोष्ट ऑस्ट्रेलियासाठी दिलासादायक ठरेल. स्टीव्ह स्मिथ सध्या बिग बॅश लीगमध्ये धुमाकूळ घालत आहे. बीबीएलच्या या चालू हंगामात स्मिथने सिडनी सिक्सर्सकडून खेळताना सलग दोन शतके आणि अर्धशतके झळकावली आहेत. स्मिथने अॅडलेड स्ट्रायकर्सविरुद्ध १०१ धावांची उत्कृष्ट खेळी साकारली होती. त्यानंतर झालेल्या सामन्यात सिडनी थंडर्सचा पराभव करताना स्मिथने नाबाद १२५ धावा केल्या. त्यानंतर स्मिथने हॉवर्ड हरिकेन्सविरुद्ध ६६ धावांची स्फोटक खेळी केली होती. त्यामुळे स्मिथ आता भन्नाट फॉर्मात आला असून भारतासाठी ही धोक्याची घंटा ठरू शकते. त्यामुळे आता स्मिथ भारताच्या दौऱ्यात कशी कामगिरी करतो, याकडे सर्वांचे लक्ष लागलेले असेल.